"Ary mba hampahiratina ny mason'ny sainareo, mba ho fantatrareo izay fanantenana avy amin'ny fiantsoany sy izay herin'ny voninahitry ny lovany eo amin'ny olona masina." -Efes. 1:18.
Mofon’Aina:
Ny fahiratan-tsaina lehibe indrindra dia tsy mahasolo ary tsy hahasolo toerana ny tena fahatsoram-po sy ny tena fahamasinana. Azo ianarana tahaka ny taranja siansa ianaran'ny olombelona ny Baiboly; saingy ny hakantony, ny porofon'ny heriny mahavonjy ny fanahy mino, dia lesona tsy azo ianarana tahaka izany velively. Raha tsy ampiharina eo amin'ny fiainana ny Teniny, dia tsy ho voan'ilay sabatry ny Fanahy akory ny fo ara-nofo. (...) Mifehy azy loatra ny fihetseham-po, hany ka tsy tsapany loatra ny haranitr'ilay lelan-tsabatra izay manindrona sy mandrava ny fitoeran'ny fahotana, izay iankohofana amin'ny "izaho". (...)
Tsy maintsy ampahiratina ny mason'ny saina; ary ny fo sy ny fisainana atao mifandrindra amin'Andriamanitra, Izay fahamarinana. Izay mibanjina an'i Jesôsy amin'ny mason'ny finoana, dia tsy hahita voninahitra eo amin'ny tenany, fa ny voninahitr'Ilay Mpanavotra no miseho ao an-tsainy sy ao am-pony. Tanteraka ny fanavotana amin'ny alalan'ny rany, ary ho velom-pankasitrahana ny fo noho ny fahotana voakosoka.
Terem-panahy hanolo-tena tanteraka ho an'Andriamanitra ilay olona nohamarinin' i Kristy, nandray ny fahamarinana, ka tafiditra ao amin'ny sekolin'i Kristy, mba hianarany Aminy — Ilay malemy fanahy sady tsy miavona am-po. Hameno ny fony ny fahalalana ny fitiavan'Andriamanitra. Hiloa-bava izy hoe: "Endrey izany fitiavany! Endrey ny fanetren-tenany!" Eo am-pamikirany amin'ny haren'ny teny fikasany dia tonga mpiray amin'ny fomban'Andriamanitra izy. Satria foana ny "izaho", dia mitosaka tsy misy mpanakantsakana ny onin'ny ranon'aina, ary mamirapiratra ny voninahitr'Andriamanitra. Eo am-pibanjinany mandrakariva an'i Jesôsy, dia mihamitovy amin'Andriamanirta ny olombelona. (...)
Ny olona amin'ny fahadiovany sy ny fahatanterahany no raisin'i Kristy ho valisoan'ny fijaliany, ny fanetren-tenany, ny fitiavany, ary fampitomboana ny voninahiny; i Kristy no ivo lehibe iaingan'ny famirapiratan’ny voninahitra rehetra. - OHC, t. 203.