"Hataontsika ahoana no fandositra raha tsy mitandrina izao famonjena lehibe izao isika? dia ilay nampilazaina ny Tompo tamin'ny voalohany, ary nohamafisin'izay nandre tamintsika kosa." - Heb. 2:3.
Mofon'Aina:
Tsy nisy navelan'Ilay Tompon'ny famonjena avy an-danitra hisy tomika ny drafitra; tonga lafatra avokoa ny dingana rehetra ao anatin' izany. Navela holanjain' i Jesôsy ny fahotan'izao rehetra izao, ary nomen'Andriamanitra ny tombambidy ambony indrindra ny fahorian'ny olombelona tao amin'i Jesôsy mba hahazoan' izao tontolo izao famelan-keloka amin'ny alalan'ny finoana ilay Mpisolo. Aoka izay meloka indrindra tsy hatahotra fandrao tsy hamela ny fahotany Andriamanitra, satria ny fahombiazan'ny sorona ataon'Andriamanitra no hanafoa-nana ny famaizan'ny lalàna. (...)
Endrey! Mahatalanjona tokoa ny drafi-panavotana ao amin'ny fahatsorany sy ny fahatanterahany! Tsy mitondra famelana feno ho an'ny mpanota fotsiny izany fa mamerina amin'ny laoniny ny mpandika lalàna ary manao lalana hahafahana mandray azy ho zanak'Andriamanitra. Amin'ny alalan'ny fankatoavana no hahafahany ho tonga manam-pitiavana sy fiadanana ary fifaliana. Ny finoany no afaka mampikambana azy amin'i Kristy na dia ao anatin'ny fahalemeny aza; i Kristy, ilay loharanon'ny hery avy any an-danitra. Ary amin'ny alalan'ny fahamendrehan'i Kristy no hahitany sitraka eo imason'Andriamanitra, satria efa namaly ny fitakian'ny lalàna i Kristy ary efa nampitafy ny Fahamarinany amin'ilay fanahy mino izay mibebaka. (...)
Fitiavana manao ahoana re izany! Fitiavana mahatalanjona no nasehon'ilay Zanak'Andriamanitra! (...) Alain’ i Kristy avy any amin'ny toerana ambany indrindra ny mpanota ka dioviny sy asandrany. Rehefa mibanjina an'i Jesôsy amin'ny maha-Izy Azy ny mpanota dia voaova sy voasandratra ho amin'ny fahamendrehana faratampony, eny ho eo amin'ny fipetrahan'i Kristy eo amin'ny seza fiandrianany mihitsy aza. (...) Ny drafi-panavotana no antoka hiatrehana ny fahamehana rehetra sy izay rehetra mety ilain'ny fanahy. Raha toa izany misy tsiny dia ho nanana fialan-tsiny ny mpanota amin'ny fanaovany an-tsirambina ny fanarahana ny fitsipiny, kanefa ilay Andriamanitra mandrakizay dia mahalala izay rehetra ilain'ny olombelona, ary fitahiana mitafotafo no nomena mba hanohanana ny zavatra ilaintsika rehetra. (...)
Inona ary no azon'ny mpanota lazaina amin'ny andro Iehiben'ny fitsarana farany ho fialan-tsiny noho ny fanaovany an-tsirambina ny famonjena natolotra azy? - TMK, t. 96.