"Fa raha tsy amin'ny finoana, dia tsy misy azo atao hahazoana sitraka aminy; fa izay manatona an'Andriamanitra dia tsy maintsy mino fa misy Izy sady Mpamaly soa izay mazoto mitaky Azy." - Heb. 11:6.
Mofon'Aina:
Tonga ny fotoana tokony hiandrandrantsika fitahiana lehibe avy amin'i Jehôvah . Tsy maintsy mijoro amin'ny fenitra ambony kokoa mikasika ny finoana isika. Kely loatra ny finoantsika. Ny Tenin'Andriamanitra no andry ho antsika. Tsy maintsy raisintsika izany, tokony hinoantsika ny teny tsirairay voasoratra ao. Ny fisian'izany toky izany no ahafahantsika mitaky zavatra lehibe, ary ho tonga amintsika araka ny finoantsika izany. (...)
Lehibe lavitra noho izay heverintsika ny hevitry ny fiasan'ny finoana. Midika ho fianteherana tena izy amin'ny teny voalazan'Andriamanitra mazava izany. Tokony haseho amin'ny asa ataontsika ny finoantsika fa hanao araka izay nambarany tokoa Andriamanitra. Tsy natao hihemotra na hijanona tsy hihetsika tsy akory ny fiainan'ny zavaboary (...). Tsy maintsy mandroso isika, miasa amin'ny finoana — finoana izay miasa amin'ny fitiavana sy manadio ny fanahy amin'ny aloky ny fitiavan-tena rehetra. Tsy ny tenantsika no tokony hianteherantsika fa Andriamanitra. Aoka isika tsy hikolokolo tsy finoana. Tsy maintsy manana finoana izay mihazona an'Andriamanitra amin'ny teniny isika. (…)
Ny tena finoana marina dia miorina amin'ny fanaovana araka izay nasain'Andriamanitra atao fa tsy famoronan-javatra tsy nanomezany baiko tsy akory. Ny rariny, ny fahamarinana, ny famindrampo, ireo dia voan'ny finoana. Ilaintsika ny mandeha araka ny lalan'Andriamanitra; rehefa izay dia ho voan'ny finoantsika ny asa tsara (...). Tsy maintsy ho tsara aloha ny hazo vao hitondra voa tsara. Tsy maintsy manolo-tena amin'ny fahafenoany ho an'Andriamanitra isika. (...)
Endrey izany saha naseho teo anoloako! Tsy maintsy miasa lalina ao anatin' ireo vahoakantsika isan'andro ny Fanahin'Andriamanitra. Tsy maintsy manana finoana izay miasa amin 'ny fitiavana izy ireo, finoana avy amin'Andriamanitra izany. (...) Rehefa miasa amin'ny fitiavana ny finoantsika, tahaka ny fitiavana izay nasehon'i Kristy teo amin'ny fiainany, dia ho mafy orina izany (...). Saingy tsy ho velona ao anatintsika i Kristy raha tsy maty aloha ny "izaho" (...). - TMK, t. 226.