"Izaho dia Izaho ihany no Jehôvah ary tsy misy Mpamonjy afa-tsy Izaho. (..) Dia hianareo no vavolombeloko, hoy Jehôvah , ary Izaho no Andriamanitra." - Isa. 43:11,12.
Mofon’aina:
Hoy ny Tompo amin'ireo mpanara-dia Azy marina: "Izao olona noforoniko ho Ahy izao no hanambara ny fiderana Ahy." — and. 21. Izy ireo no vavolombeloko, nofidiko hisolo tena Ahy eo amin'izao tontolo izao mpikomy. (...) Miantso antsika hiara-miasa Aminy Andriamanitra, ary rariny sy mitombina ny fangatahany (...). Matoa misalotra ny anaran'i Kristy isika dia manaiky hisolo tena Azy. Mba ho marina ny fanolorantsika tena, dia tsy maintsy ao anatintsika i Kristy, Ilay fanantenana ny voninahitra. Tsy maintsy mitovy bebe kokoa hatrany amin'ny fiainan'i Kristy ny fiainantsika isan'andro. Tsy maintsy Kristianina amin'ny asa sy ny fahamarinana isika. (...) Ireo izay tena Kristianina marina ihany no harahabain'i Kristy tonga soa any an-danitra. Ny fiainan'ireo izay mitonona ho Kristianina kanefa tsy miaina araka ny fiainan'i Kristy dia manala baraka ny fivavahana.
Tsy mangataka ny hanaovantsika sorona lehibe Andriamanitra mba hahazoantsika ny fankasitrahany. Ny hany angatahiny dia fanompoana avy amin'ny fo torotoro sy manetry tena, izay manaiky amim-pifaliana sy fisaorana ny fanomezany maimaimpoana. (...)
Azonao an-tsaina ve ny tombam-bidinao eo imason'Andriamanitra? Hoy Izy, mpiara-miasa Amiko ianao. Mamela ny fahazavanao hamirapiratra eo amin'izao tontolo izao lavo ve ianao? Miezaka mampiasa ny fahaizanao rehetra sy ny herinao rehetra izay nomen'Andriamanitra anao ve ianao? Mety tsy ho mpitandrina ianao, saingy azonao atao ny mijoro ho vavolombelona. Mety tsy ho mpandaha-teny mahay ianao, saingy ny fiainanao ao amin'i Kristy sy ny famelanao ny fahazavanao hamirapiratra eo imason'ny olona dia efa mitory zavatra betsaka.
Ny Kristianina marina sy maha-te ho tia no tohan-kevitra mahomby indrindra manohana ny fahamarinan'ny Baiboly. Izany olona izany no solontenan'i Kristy. Ny fiainany no porofo mandresy Iahatra indrindra ny amin'ny herin'ny fahasoavan'Andriamanitra. Rehefa manana ny fahamarinan'i Kristy eo amin'ny fiainany isan'andro ny vahoakan'Andriamanitra, dia hiova fo ny mpanota ary fandresena maro no ho azo amin'ny ady atao amin'ny fahavalo. HP, t. 318.