« Ary nisy liona sy bera tonga tao ka nahalasa zanak'ondry teo amin’ny ondry, dia nanenjika azy aho ka namely azy, ary azoko teny am-bavany ilay zanak’ondry; ary nony handramatra ahy izy, dia nohazoniko tamin ’ny somony, ary nasiako ka matiko. ». 1 Sam. 17:34,35.
Mofon’aina:
Ary i Davida nitombo fitia tamin’Andriamanitra sy ny olona ka niezaka tamin’ny fony rehetra hanao ny sitrapon’Andriamanitra. Nahita zava-baovao hodinihina indray izy. Ny fotoana laniny tao an-dapan’ny mpanjaka, dia naneho taminy, ankoatra ireo adidy eo amin’ny fitondram- panjakana, ny sasantsasany tamin’ny fakam-panahy namely ny fanahin’i Saoly ary koa nanazava taminy ny zava-miafina momba ny toetrany malahelohelo sy mora tohina. Tsinjony fa alofan’ny lamban’ny lonilony ny satroboninahitry ny fiandrianan’ny mpanjaka ka nanaloka hatrany amin’ny tokantranony izany, izay tsy ahitam-pahasambarana mihitsy. Mba hanadinoany ireny fiheverana mampalahelo ireny, dia noraisiny ny lokangany ka ny feony manga no nanainga ny eritreriny ho any amin’Ilay Mpanao ny soa rehetra sy Mpampisava ny rahona izay nanakona ny fitsinjovana ny hoavy indraindray.
Tahaka ny nanomanany an’i Mosesy hanao ny asany, dia toy izany koa no nanabeazany ny zanak’i Jese ho tonga mpitarika ny olom-boafidiny. Tany am-piandrasana ondry, no nahafantaran’i Davida ny fiahian’Ilay Mpiandry lehibe ny ondriny. Ny havoana mangina sy ny hady haolo niandrasany ny ondriny no nataon’ny bibidia maro fierena. Imbetsaka no nisy liona nivoaka avy tany amin’ny ala matevina any Jôrdana na nisy bera noana avy tany an-davany tonga nihinana ny andian’ondry. Araka ny fanao tamin’izany andro izany, na dia antsamotady sy tehin’ny mpiandry ondry fotsiny aza no hany fiadiana teny an-tanany, dia nampiseho hatry ny ela herim-po sy tanjaka nentiny niaro ireo ondry aman-osy nasaina nandrasany ireo izy. (...) Ireny fanehoam- pahasahiana izay nanabe ny herim-po sy ny fahatoniana ary ny fitokiany an’Andriamanitra ireny no nahatonga ny tandapa handoka azy teo amin’ny mpanjaka ho “lehilahy mahery” ary koa: “Jehovah momba azy". — CC, t. 161.