"Midera an'i Jehôvah , miantsoa ny anarany; ataovy fantatra any amin'ny firenena ny asany. Mihira ho Azy, mankalaza Azy; saintsaino ny fahagagana rehetra ataony." – Sal. 105:1,2.
Mofon’aina:
Tokony haverimberina mandrakariva ny fifandraisan' Andriamanitra amin'ny olony. Matetika manao ahoana ireo mari-dalana napetraky ny Tompo tamin'ny fifandraisany tamin'ny Isiraely fahiny! Mba tsy hanadinoan'izy ireo ny tantara lasa, dia nandidy an'i Mosesy Izy mba handrakitra ireny toe-javatra ireny amin'ny endrika hira, izay azon'ny ray aman-dreny hampianarina ny zanany. Nasaina nanambatra fahatsiarovana izy ireny, ka hametraka izany ho talaky maso mandrakariva. Nisy fahasahiranana manokana tsy maintsy niaretana mba hitahirizana azy ireny, ka rehefa hanadihady momba ireo zavatra ireo ny ankizy, dia ho azo averina amin'izy ireo ny tantara iray manontolo.
Tahaka izany no nitadidiana mandrakariva ny fitondran'Andriamanitra sy ny fahatsarany ary ny famindrampony teo amin'ny fikarakarany sy ny fanafahany ny olony. Koa asaina isika mba hahatsiaro "ny andro fahiny izay naharetanareo ny ady mafy tamin'ny fahoriana, rehefa nohazavaina hianareo" – Heb. 10:32. Niasa tahaka ny Andriamanitra mpanao asa mahagaga ho an'ny olony amin'izao taranaka ankehitriny izao ny Tompo. ( ...) Ilaintsika mandrakariva ny mitantara ny fahatsaran'Andriamanitra sy ny midera Azy noho ny asa mahagaga ataony.
Koa dia aoka tsy hanary ny fahatokiantsika isika, fa aoka hanana toky miorina mafy, eny, mafy noho ny taloha aza. "Efa novonjen'i Jehôvah isika hatramin'izao" – 1 Sam. 7:12, ary hamonjy antsika hatramin'ny farany Izy. Aoka isika hijery ny tsangambato fampahatsiarovana ny amin'izay efa nataon'ny Tompo hampahery antsika sy hamonjy antsika tamin'ny tanan'ny mpandringana. Aoka hotsarovantsika ny famindrampo rehetra izay efa nasehon'Andriarnanitra tamintsika — ny ranomaso izay efa nofaohiny, ny fahoriana izay efa nampiononiny, ny fanahiana izay efa nesoriny, ny tahotra izay efa nalany, ny nilaina izay efa nomeny, ny fitahiana izay efa azo (...)
Tsy isalasalana fa tsy maintsy manampo fahoriana hafa koa isika, ao amin'ny zava-tsarotra izay hitranga tsy ho ela intsony. Nefa izay hitantsika tamin'ny lasa, no aoka ho toky ho antsika amin'ny ho avy ka hanao hoe: "Efa novonjen’i Jehovah isika hatramin 'izao. " "Ary hifamatra amin'ny andronao ny fiadananao" – Deo. 33:25. Ny fizahan-toetra dia tsy hihoatra ny hery izay homena antsika hanoherana azy. Koa dia aoka isika hiasa eo amin'izay nametrahan'ny Tompo antsika, ary hino fa na inona na inona mihatra, dia hisy hery homena antsika arakaraka ny fizahan-toetra. – CC, t. 364.