"Indro, efa nomeko fahefana hanitsaka menarana sy maingoka sy handresy ny hery rehetra ananan'ny fahavalo hianareo (...)." - Lio. 10:19.
Mofon’aina:
Lasan-ko babon'i Satana ara-dalàna ny olombelona lavo. Ny hamonjy azy amin'ny herin' io fahavalo lehibe io no asa nanirahana an'i Kristy. Manjary fironana ao anatin'ny olona ny manaraka ny tolo-tsaina avy amin'i Satana, ary tsy hainy toherina io fahavalo tsy mifaditrovana io raha tsy mitoetra ao anatiny i Kristy, Ilay Mpiady mahery, mitarika ny faniriany sy manome hery azy. Andriamanitra irery ihany no mahay mametra ny herin' i Satana. (...) Fantatr'i Satana tsara, mihoatra ny ahafantaran'ny olona izany, ny hery lehibe mety hananan'ny olona handresena azy raha ao amin'i Kristy ny heriny. Na ny mpino malemy indrindran'ny fahamarinana aza, rehefa mitalaho fanampiana amim-panetren-tena amin'Ilay Mpiady mahery, ka miantehitra tanteraka amin'i Kristy, dia afaka handresy amim-pahombiazana an'i Satana sy ny tafiny rehetra. (...)
Hamory ny anjeliny rehetra i Satana hanohitra ny fandrosoan'ny fanahy, na dia fanahy iray monja aza, ary raha azony atao dia handrombaka azy eo an-tanan'i Kristy izy. (...) Saingy raha mitozo izany fanahy tsy manan-kery sy tandindomin-doza izany, ka miantoraka amin'ny fahamendrehan'ny ran'i Kristy, dia hihaino ny vavaka mafana ataony amim-pinoana ny Mpamonjy ary haniraka anjely mahery maro hanafaka azy. (...) Mangovitra i Satana sy ny tafiny manontolo eo am-pandrenesana ny vavaka mafana ataon'ny olona.
Tsy inona fa ny fangorahan'i Kristy be fitiavana, ny fahasoavany, sy ny heriny tsitoha, no mahay manome hery antsika hampitakemotra ity fahavalo be kiry ity, sy hahafehy ny fanoheran'ny fontsika. Inona no herintsika? Ny fifaliana avy amin'ny Tompo. Aoka hameno ny fontsika ny fitiavan'i Kristy, dia ho vonona isika handray ilay hery efa voaomana ho antsika. (...)
Ny mpikatsaka ny fahamarinana, izay mibanjinana an'i Kristy mba hanahafany Azy, dia mahita ny fahatanterahan'ny foto-kevitry ny lalàn' Andriamanitra, ary manjary tsy mety ho afa-po na amin' inona na amin' inona afa-tsy amin'ny fahatanterahana ihany. (...) Tsy maintsy hisy ady atao amin'ireo toetra nambolen' i Satana (...). Fantany anefa fa manana hery mahavonjy ny Mpanavotra, izay hampandresy azy ao anatin'ny ady. — GAG, t. 239.