Vakio ny Kol. 4:2-4. Inona no fitsipika mahakasika ny vavaka hitanao ao amin'ireo toko sy andininy ireo? Inona no antom-bavaka ataon'i Paoly eto?
Anisan'ireo teny manan-danja indrindra azontsika lazaina amin'ny olona iray miatrika toe-java-tsarotra samihafa (na mahakasika ny fianakaviana izany na ny fahasalamana, na vola na ny hafa koa) ny hoe: "mivavaka ho anao aho." Izany no fomba fifandraisana sy fifaneraserana nofidin'ny lanitra ho an'ny olombelona. "Isan'ny soritr'asa nataon'Andriamanitra ny hanome antsika, ho valin'ny vavaky ny finoana, izay tsy natolony raha tsy nangatahintsika." - HM, t. 546 (ed. 1983).
Maro ireo teny manan-danja nampiasain'i Paoly mikasika ny vavaka: "Mahareta", "amin-kafanam-po" (dikanteny NKJV), "miambena", ary "amin'ny fisaorana izay maneho fa vavaky ny finoana izany (Kol. 4:2). Milaza amintsika izy mba hivavaka "mandrakariva" (Efes. 6:18) ka "aza mitsahatra" - 1 Tes. 5:17. Izao no mahagaga indrindra: na dia "tsy fantatsika izay vavaka tokony hataontsika" dia "ny Fanahy no mifona amin'ny fitarainana tsy azo tononina. Rom. 8:26.
Avereno vakina ny Kol. 4:3. Inona no "varavarana ho an'ny teny" mety hosokafan'Andriamanitra ho anao hahafahanao mizara ny finoanao?
Tamin'ny fombamanan-danjatokoanonangatahan'iPaolytamin'Andriamanitra ny teny tokony holazainy. Indraindray isika rehefa mamaky ny epistily nosoratany na ny lahateniny ao amin'ny Asan'ny Apostoly, dia mieritreritra fa olona mahay mandaha-teny mandrakariva ity apostoly ity ary tsy mba misalasala ny amin'izay tokony holazainy. Kanefa eto dia mivavaka izy mba "hanazavako tsara" ny hafatra (Kol. 4:4, DIEM). Mampiasa teny grika iray tena manan-danja koa izy (del) ao amin'ny fiafaran'io andalan-teny io, izay azo adika hoe "araka ny tokony hitenenako"; manondro ny adidy masina amin'ny fitoriana ny filazantsara izany. Tsapany ary nekeny fa zava-dehibe ny hitondrana ny hafatra amin'ireo olona manan-kaja tao amin'ny fitondram-panjakana romanina, anisan'izany ireo tao an-tranon'i Kaisara.
"Tsy ilaina mandrakariva tsy akory ny hiondrika raha hivavaka. Kolokoloy ny fahazarana miresaka amin'ny Mpamonjy rehefa irery ianao, rehefa mandeha ary rehefa sahirana amin'ny asa andavanandro. Aoka hisandratra mangina tsy an-kijanona ny fo hanao fangatahana fanampiana, fahazavana, hery, fahalalana. Aoka ny fofonainao rehetra ho vavaka." - TMF, t. 342 (ed. 1997).