Hodinihina mandritra ny herinandro: Mar. 12:41-44; Mar. 13:1-32; Dan. 9:24-27; Dan. 7:25; 1 Tes. 4:13-18.
Tsianjery: "Ary amin'izay ny Zanak'olona dia ho hita avy eo amin'ny rahona amin'ny hely lehibe sy ny voninahitra. Ary amin'izay dia haniraka ny anjely lzy, ary hanangona ny olom-boafidiny avy amin'ny vazan-tany efatra hatramin'ny faran'ny tany ka hatramin'ny faran'ny lanitra." - Mar. 13:26,27.
Tantara fohy ao amin'ny fiafaran'ny Mar. 12 no iantombohan'ny lesona amin'ity herinandro ity, izay anaovan'i Jesôsy fanambarana manan-danja momba ny fihetsika tsotra nataon'ny mpitondratena iray. Ny Mar. 13 anefa no tena ifotoran'ny ampahany betsaka amin'ny lesona mandritra ny herinandro, izay faminaniana manaitra momba ny anjara miandry ny tempolin'i Jerosalema sy ny hafa. Ity toko ity, sy ireo toko mitovy aminy (Mat. 24 sy Lio. 21) dia miresaka momba ny faharavan'i Jerosalema sy ny toe-javatra aorian'izany, eny tonga hatramin'ny fiafaran'izao tontolo izao mihitsy aza.
Ambaran'ny Mar. 13 mazava tsara fa manomboka amin'ny fotoan'ilay mpaminany (Jesôsy) ny faminaniana ka mifarana amin'ny andro farany, dia ny fiaviany fanindroany. Izany rafitra izany dia manaraka izay antsoina hoe "fanazavana ny faminaniana momba ny andro farany araka ny tantara," izay mifanohitra amin'ny fanasokajiana ireny faminaniana ireny ho ao anatin'ny vanim-potoana lasa na koa amin'ny hoavy.
Tahaka ireo fampianarana maro nataon'i Jesôsy ao amin'ny filazantsaran'i Marka, ny fampianaran'ny Tompo dia setrin'ny fanontaniana napetraky ny mpianatra na ny tsy fahatakaran'izy ireo. Ireny fanontaniana sy tsy fahatakaran-javatra ireny no nanome hirika ho an'i Jesôsy hampianarana fahamarinana manan-danja ho an'ny fiainana sy ny fanandramana kristianina. Tsy manambara mialoha ny hoavy fotsiny i Jesôsy fa manome torolalana ho an'ny mpianany tamin'izany sy ankehitriny koa ny amin'ny fomba hiomanany ho amin'ny fiatrehana ireo fitsapana ho avy.