" Raha hazoto hihaino ny feon’i Jehôvah Andriamanitrao hianao ka hanao izay mahitsy eo imasony sy hihaino ny lalàny ary hitandrina ny didiny rehetra, dia tsy hisy hataoko aminao ireny aretina rehetra ireny, izay nataoko tamin’ny Egyptiana; fa Izaho no Jehôvah Izay mahasitrana anao." Eks. 15:26.
Mofon’aina:
Mpitarika sy mpampianatra teo amin’ny Isiraely fahiny i Kristy, ary nampianatra azy ireo Izy fa valisoan’ny fankatoavana ny lalàn’Andriamanitra ny fahasalamana. Ilay Dokotera lehibe nanasitrana ny marary tany Palestina dia efa niteny tamin’ny vahoakany avy tao amin’ny andri-rahona, ka nilaza taminy izay tsy maintsy hataony sy izay tian’Andriamanitra hatao ho azy. “Raha hazoto hihaino ny feon’i Jehôvah Andriamanitrao hianao, hoy Izy, ka hanao izay mahitsy eo imasony sy hihaino ny lalàny ary hitandrina ny didiny rehetra, dia tsy hisy hataoko aminao ireny aretina ireny; (...) fa Izaho no Jehôvah Izay manasitrana anao” – Eks. 15:26. Nanome baiko mazava ny Isiraely i Kristy mikasika ny fahazarany eo amin’ny fiainana, ka nanome toky Izy fa “harovany tsy ho azon 'aretina izy” – Deo. 7:15. Rehefa notanterahin’ny Isiraely ny fepetra, dia hita fa marina ny teny fikasana teo aminy.
Ho antsika ireny lesona ireny. Misy fepetra tokony hotazonin’izay rehetra te hiaro ny fahasalamana. (...) Tsy mahafaly ny Tompo ny tsy fahalalana mikasika ny lalàny, na ara-nofo na ara-panahy. Tokony hiara-miasa amin’Andriamanitra isika amin’ny famerenana ny fahasalamana amin’ny vatana sy amin’ny fanahy koa.
Tokony hampianatra ny hafa koa isika hiaro sy hamerina ny fahasalamany. Ho an’ny marary dia tokony hampiasa ny fanafody efa nomanin’Andriamanitra eo amin’ny zavaboary isika, ary tokony hanondro azy Ilay hany afaka mamerina izany. (...) Ny tena votoatin’ny Filazantsara dia ny famerenana amin’ny laoniny ny fahasalamana, ka tian’ny Mpamonjy ny hibaikoantsika ny marary, ny tsy manana fanantenana, sy ny tra-pahoriana hamikitra amin’ny heriny.
Tao amin’ny fanasitranana rehetra nataon’i Kristy ny herin’ny fitiavana; koa ny fizarantsika io fitiavana io, amin’ny alalan’ny finoana, no mety hahatonga antsika ho fiasana hanao ny asany. Raha ataontsika an-tsirambina ny mamatotra ny tenantsika hifandray amin’Andriamanitra amin’ny alalan’i Kristy, dia tsy afaka hikoriana be dia be avy amintsika ho amin’ny vahoaka ny hery manome aina toy ny herinaratra.” – IFM, tt. 883,884.