April 2024

Naseho niharihary teo amin’ireo toe-javatra nialoha ny fandravana an'i Jerosalema ny famindram-pon’Andriamanitra, ny fahasoavany, ny fitantanany sy ny fahalalany mialoha ny hoavy. Nanodidina ny tanàna i Cestius Gallus sy ireo tafika rômanina. Tamin’ny fomba tsy nampoizina, raha toy ny efa akaiky dia akaiky ny fanafihany dia nihemotra izy ireo. Nanenjika azy ny tafika jiosy ka nandrombaka fandresena lehibe.

Torotoro ny fon’i Jesôsy raha nipetraka teo an-tendrombohitra Oliva ary nitazana ny tanànan’i Jerosalema. Izao no ambaran’ny filazantsaran’i Jaona: « Tonga tany amin’ny Azy Izy, fa ny Azy tsy nandray Azy » - Jao. 1:11. Nanao izay rehetra azony natao i Jesôsy mba hamonjena ny olony amin’ny fandravana ho avy amin'ilay tanàna malalan’izy ireo.
Avy amin’ny fo feno fitiavana tsy manam-petra ny fitiavan'i Jesôsy ny olony. Imbetsaka no namerimberenany antso tamim-pitiavana ny mba hibebahan’izy ireo sy hanekeny ny fanasany feno fahasoavana sy famindram-po.

Hodinihina mandritra ny herinandro : Lio. 19:41—44; Mat. 23:37, 38; Heb. 11:35-38; Apôk. 2:10; Asa. 2:44-47; Jao. 13:35.

Tsianjery : « Aza matahotra ianao, fa momba anao Aho; ary aza miherikerika foana, fa Izaho no Andriamanitrao; mampahery anao Aho sady mamonjy anao; eny, mitantana anao amin'ny tanana ankavanan'ny fahamarinako Aho. » – Isa. 41:10.

FAMPIDIRANA

Tamin’ny nandroahana an’i Satana avy tany an-danitra. dia naneho ny fahamarinany Andriamanitra ary nihazona ny voninahitry ny seza fiandrianany. Fa rehefa nanota kosa ny olona tamin’ny fanekeny ny fitak’io fanahy nivadika io, dia naneho porofo mibaribary ny fitiavany Izy tamin’ny fanolorany ny Zanani-lahy tokana ho faty ho an’ilay taranaka lavo. Eo amin’ny fanavotana no anambarana ny toetra amam-panahin’Andriamanitra.

Izay nataon’i Jesôsy ho antsika teo amin’ny hazo fijaliana dia nahatonga Azy ho afaka hanao fanelanelanana ho antsika any an-danitra. Ilay Tompontsika nitsangana tamin’ny maty no Mpisoronabentsika lëhibe, manome antsika izay rehetra ilaina mba hahavoavonjy antsika sy hiainantsika mandrakizay ao amin’ny fanjakan'Andriamanitra Izy.

Vakio ny Heb. 4:15,16 sy ny Heb. 7:25. Ahoana no anomezan’ireo andininy ireo toky antsika eto amin'ity tany feno fakam-panahy, fijaliana, aretina, ary fahafatesana ity?

Nanota i Adama sy i Eva ary nolazain’Andriamanitra fa tsy maintsy ilaozany ny saha Edena fonenany. Manomboka izao dia ny fisasarana sy ny fijaliana no ho anjarany. Tsy maintsyhijaly sy ho faty ao anatin’ny tsy fananam-panantenana ve izy ireo? Ny fahafatesana ve no faran’ny zavatra rehetra?

Raha namorona ny tany Andriamanitra dia nataony tonga lafatra izany. Ny Baiboly dia milaza fa “hitan’Andriamanitra izay rehetra nataony, ary, indro, tsara indrindra izany” – Gen. 1:31. Tsy nisy pentim-pahotana na ratsy, na taiza na taiza. Kanefa nomen’Andriamanitra an’i Adama sy i Eva koa ny fahafaha- misafidy, tahaka izay nomeny an’i Losifera. Tsy te hanana milina eto an-tany Andriamanitra, toy ny tsy naniriany hanana milina tany an-danitra.

Tsy misy fanazavana mitombina ny anriin'ny antony namelan’i Losifera, ilay anjely tonga lafatra, ny avonavona sy ny fialonana hamaka tao am-pony sy ho tonga fikomiana amin’ny Mpamorona azy. Niova ho fikomiana ny avonavon’i Satana. Nampangainy ho tsy marina sy mitanila Andriamanitra. Niampita tamin’ireo anjely ny fisalasalany sy ny fanendrikendrehany.

Vakio ny Apôk. 12:4. Inona no ambaran'io andininy io momba ny fahaizan'i Satana mamitaka? Anjely firy no lavo noho ny lainga nataony momba an'Andriamanitra?