March 2025

Araka ny efa hitantsika, ny lalåna sy ny fahasoavana dia tsy mifanipaka. Samy manana ny asany kosa izy ireo, izay mifandrindra amin'ny fitiavana sy ny fahamarinan Andriamanitra. Ho nahavery hevitra ny Isiraelita fahiny raha nifanohitra ny lalana sy ny fahasoavana, fanehoana lehibe ny fahasoavan'Andriamanitra mantsy no nandraisan'izy ireo ny fanomezan Andriamanitra ny lalana.

Ny fitiavana no fototra iorenan'ny lalan'Andriamanitra. Rehefa manandratra ny lalàna Andriamanitra, dia manandratra ny fitiavana. Izany no anton'ny nahafatesan'i Jesôsy hamonjy ny mpanota, mba hahafahany manandratra ny lalàna sy mandrotsaka amintsika koa ny fahasoavany. Dia izany no mahatonga Azy ho marina sady mpanamarina izay rehetra mino Azy (Rôm. 3:25,26). Fanehoam-pitiavana re izany! Koa tsy manafoana ny lalàna velively ny fanavotana antsika, fa manamafy izany aza.

Tsy fitsipika manjavozavo no mandrafitra ny lalan'Andriamanitra, fa maneho fifandraisana kosa izany. Hita mazava tsara ao amin'ny Didy folo izany. Efa napetraka hatrany amin'ny saha Edena ny foto-kevitra iorenan'ny Didy folo, dia ny foto-kevitry ny fitiavana izay tokony hifehy ny fifandraisan'Andriamanitra sy ny olombelona, ary ny olona samy olona.

Hodinihina mandritra ny herinandro: Eks. 20:1-17; Rôm. 6:1-3; Rôm. 7:7-12; Jer. 31:31-34; Mat. 23:23,24; Jak. 2:1-9.

Tsianjery:

"Aza avela hisy tsy voaloa na amin'iza na amin'iza, afa-tsy ny fifankatiavanareo ihany; fa izay tia ny namany dia efa nahatanteraka ny lalàna." - Rôm. 13:8.

Vakio "Ny Sabata", toko faha-29 no amin'ny IFM.

Ao amin'ny fitantaran'i Lioka, taoriana indrindran'ny fanambaran'i Jesõsy ireo didy roa lehibe momba ny fitiavana an'Andriamanitra sy ny fitiavana ny namana, dia nisy mpahay lalana "ta-hanamarina ny tenany ka nanao tamin'i Jesôsy hoe: Iza ary no namako?" Lio. 10:29. Ho setrin'izany, dia nanao fanoharana tsy mahazatra, nefa manaitra, mikasika ilay Samaritana tsara fanahy i Jesôsy.

Manasongadina mandrakariva ny antson’Andriamanitra ho amin'ny fampanjakana ny rariny eo amin'ny fiarahamonina ireo mpaminany ao amin'ny Soratra Masina. Averimberin'ny Baiboly ny firesahana momba ireo olana mahakasika ny tsy rariny sy ny fampahoriana ny hafa. Ny antso mba hiavian'ny fitsaran'Andriamanitra aza dia antso mba hampiorenany ny rariny.

Ambaran'ny Soratra Masina fa tia ny rariny Andriamanitra ary mankahala ny ratsy (jereo ohatra ny Sal. 33:5 sy ny Isa. 61:8), ary manohina Azy tanteraka ny tsy rariny ariny izay mahatonga Azy haneho fahatezerana ara-drariny manoloana ny fampahoriana ny hafa. Manerana ny Testamenta Taloha sy Vaovao, dia miantra mandrakariva ireo iharan'ny fampijaliana sy ny fampahoriana Izy, ary maneho fahatezerana ara-drariny amin'ireo mpampahory.

I Jesôsy mihitsy no nilaza fa ny fitiavana an' Andriamanitra sy ny fitiavana ny namana no didy lehibe indrindra. Mitaky fahafoizan-tena izay maneho amin'ny fomba azo tsapain-tanana ny fitiavana ny hafa ny fampiharana ireo fitsipika ireo; izany tokoa no atao hoe manaraka ny dian'i Jesôsy .

Raha toa ny fitiavana an'Andriamanitra sy ny hafa no didy roa lehibe indrindra, inona àry ny fahotana roa lehibe indrindra?

Vakio ny Sal. 135:13-19. Inona no ambaran'ireo toko sy andininy ireo momba ny fahotana asongadina manerana ny Soratra Masina?

Mba hahafahantsika misaintsaina izay azontsika atao, isika manokana sy miaraka amin'ny hafa, ho fampandrosoana ny fitiavan'Andriamanitra sy ny rariny eto an-tany, dia mety indrindra ny mifantoka amin'ny didy nomen'Andriamanitra antsika.

Vakio ny Mat. 22:34-40. Ahoana no namalian'i Jesôsy ny fanontanian'ilay mpahay lalana?