Vakio “Ny tempoly sy ny fitokonana azy", toko faha-2 ao amin'ny Mpaminany sy Mpanjaka, EGW; “Ny tombontsoa avy amin'ny mozika", Hafatra ho an'ny tanora, EGW, tt. 150-151.
Ahitana Salamo miisa 150, izay voasokajy ho boky dimy, ny bokin’ny Salamo: Boky I (Sal. 1-41), Boky II (Sal. 42-72), Boky III (Sal. 73-89), Boky IV (Sal. 90-106) ary ny Boky V (Sal. 107-150). Ny fizaran’ny bokin’ny Salamo ho dimy dia fomba amam-panao jiosy tany aloha izay mifanindran-dalana amin’ny fizarana ny bokin’ny Pentatioka ho dimy.
Maneho porofon’ny fitambarana Salamo izay efa nisy tany aloha ny bokin’ny Salamo: ny Salamon’ny Koraita (Sal. 42-49, 84, 85, 87, 88), ny Salamon’i Asafa (Sal. 73-83), ny fihirana fiakarana (Sal. 120-134), ary ny Salamo Haleloia (Sal. 111-118; 146-150). Ny Sal. 72:20 no maneho ny fitambaran’ny Salamo vitsivitsy nosoratan’i Davida.
Raha ampifandraisina amin’ny fotoana nanjakan’i Davida sy ny fanjakatokana voalohany (taonjato fahafolo TIK) ny ankamaroan’ny Salamo, ny fitambarana Salamo kosa dia mitohy tao amin’ny taonjato taty aoriana: ny fanjakatokana nizarazara, ny fahababoana ary fotoana taorian’ny fahababoana. Azo heverina fa natambatr’ireo mpanora-dalàna hebreo teo ambany fitarihan’i Ezra ho boky iray ireo fitambarana Salamo vitsivitsy rehefa nanao izay hametrahana ny fanompoam-pivavahana tao amin’ny tempoly vaovao izy ireo.
Tsy manaisotra ny maha-tsindrimandry avy amin’Andriamanitra ny bokin’ny Salamo ny nanambàran’ny mpanora-dalàna izany ho boky iray. Ireo mpanora-dalàna, tahaka ireo mpanao Salamo, dia mpanompon’Andriamanitra feno fanoloran-tena; ary Andriamanitra no nitari-dalana azy ireo tamin’ny asany (Ezra 7:6,10). Azo ampitovina amin’ny toetra maha-Andriamanitra sy olombelona tao amin’i Jesôsy tonga nofo ny maha avy amin’Andriamanitra sy nosoratan’olombelona ny Salamo. “Ny Baiboly kosa, izay misy ireo fahamarinana avy amin’Andriamanitra voalaza amin’ny fitenin’olombelona, dia mampiseho firaisan’ny maha-Andriamanitra sy ny maha-olombeiona. Ny firaisana toy izany dia hita ao amin’ny toetran’i Kristy Izay sady Zanak’Andriamanitra no Zanak’olona. Tanteraka amin’ny Baiboly, tahaka ny nahatanteraka izany tao amin’i Kristy ny hoe: ‘Ary ny Teny dia tonga nofo ka nonina tamintsika.'” – HM, 1.10.
FANONTANIANA hifanankalozan-kevitra
- Vavaka sy hira avy amin'Andriamanitra sy ny olombelona ny Salamo. Inona no hevitr'izany? Na dia saro-takarina aza izany hevitra izany, ahoana no anampian'izany antsika hahita ny fanirian’Andriamanitra hanakaiky ny olony? Ahoana no anehoan'ny Salamo amin’ny fombany manokana ny maha-akaikin’ny taranak’olombelona sy ny tsirairay avy amintsika an'Andriamanitra?
- Resaho ao amin'ny kilasy ny fotoana nahitanao andalan-tenin’ny Salamo izay miresaka mivantana mikasika ny toe-javatra niainanao. Inona ny fampaherezana sy fanantenana hitanao tao?