Indray andro raha nianatra tao amin'ny trano famakiam-bokin'ny oniversite i Martin Luther dia tonga teo amin'ny kihon-dalan'ny fiainany. Nahita dika mitovin'ny Baiboly amin'ny teny latina izy. Tsy azony an-tsaina akory ny fisian'ny boky toy io talohan'izao. Tamim-pahafinaretana no namakiany ny toko tsirairay, ny andininy tsirairay. Talanjona izy ny amin'ny fahazavana sy ny herin'ny Tenin'Andriamanitra. Rehefa namaky ireo pejin'ilay boky izy dia nanazava ny sainy ny Fanahy Masina. Tsapany fa nitarika azy ny Fanahy Masina satria ireo fahamarinana nohamaizinin'ny fomban-drazana dia toa niseho mazava avy tao amin'ireo takilan'ny Soratra Masina. lzao no nosoratany raha nanondro ny fanandramana voalohany niainany niaraka tamin'ny Baiboly izy: "Raha mba omen'Andriamanitra boky toy izao ho ahy mantsy aho!"
Inona avy ireo foto-kevitra azontsika raisina avy amin'ireto andininy manaraka ireto mikasika ny fomba tokony hahatakarantsika ny hevitry ny voalazan'ny Baiboly? Jao. 14:25,26 Jao. 16:13-15 2 Pet. 1:20,21
Ny tena manan-danja lehibe ao amin'ireo andininy ireo dia ny fanomezan-toky fa io Fanahy Masina izay nanindry mandry ireo mpanoratra ny Baiboly io ihany no mitari-dalana antsika eo am-pamakiantsika ny Soratra Masina. Izy no mpanazava ny fahamarinan'Andriamanitra. Indrisy fa maro ireo mitonona ho Kristianina ankehitriny no manamaivana ny maha-avy amin'Andriamanitra ny Baiboly fa manasongadina kosa ny maha-olombelona ao anatiny. Tsy azon'i Satana atao intsony mantsy ny manakana antsika tsy hamaky Baiboly, koa ity indray no fomba manaraka mahomby indrindra ataony: esoriny ny toetra maha-avy amin'Andriamanitra ny Baiboly, ary ataony toy ny asa soratra tsara fotsiny izany, na ratsy noho izany, ataony fitaovana famoretana hifehezana ny vahoaka ara-pivavahana.
Hitan'ireo mpanavao fivavahana mazava fa ny Fanahy Masina — fa tsy ny pretra, na ny mpitari-pivavahana, na ny papa — no mpanazava tsy mety diso ny Soratra Masina. Nisy fifanakalozan-kevitra mahaliana teo amin'i John Knox, ilay mpanavao fivavahana Ekôsey sy i Mary mpanjakavavin'i Ecosse voarakitra an-tsoratra. "Hoy i Maria: Ianao mandray ny Soratra Masina amin'ny fomba iray, ary ny mpampianatra katolika Romana mandray azy amin'ny fomba hafa; koa iza no hinoako, ary iza no hitsara izany? 'Aoka hino an'Andriamanitra Izay miteny amin'ny fomba mazava ao amin'ny teniny ianao, hoy ny navalin'ny Mpanavao fivavahana; `amin'izay tafahoatra noho ny tenin’Andriamanitra dia aoka ianao tsy hino na ny andaniny na ny ankilany. Mazava ho azy ny tenin’Andriamanitra; ary raha misy maizimaizina amin'ny toerana iray, dia ny Fanahy Masina, Izay tsy manohitra ny tenany na oviana na oviana, no manazava izany bebe kokoa amin'ny toeran-kafa, hany ka tsy mety hisy fisalasalana ho tafatoetra afa-tsy amin'izay mikiribiby hijanona eo amin'ny tsy fahalalany.'" - David Laing, The Collected Works of John Knox, boky 2. pp. 281, 284. — HM, t. 259.