Vakio ny Apôk . 13:11-18. Inona ny maha-samy hafa io bibidia faharoa io amin'ilay bibidia voalohany ao amin'ny Apôk . 13?
Nivoaka avy amin'ny ranomasina ilay bibidia voalohany; ilay bibidia faharoa kosa "niakatra avy tamin'ny tany "- Apôk. 13:11. Ny ranomasina dia maneho "olona sy vahoaka betsaka, sy firenena maro ary samy hafa fiteny' - Apôk. 17:15. Noho izany, ny tany dia maneho faritra tsy dia misy olona eto an-tany. Manodidina ny fiafaran'ny vanim-potoana ara-paminaniana nandritra ny fotoana nananan'ilay bibidia voalohany fahefana no nipoiran'ilay bibidia faharoa (Apôk . 13:5).Izany hoe, nanodidina ny taona 1798 no nisandratany.
Mifandraika tsara amin'izany fanoritsoritana izany i Etazonia. Nanambara ny fahaleovan-tenany izy tamin'ny taona 1776, nanangana ny lalàm-panorenany tamin'ny taona 1789 ary nekena ho firenena matanjaka indrindra eran-tany tamin'ny fiafaran'ny taonjato faha-19.
Tohizan'i Jaona izany hoe: "ary nanan-tandroka roa tahaka ny an'ny zanak'ondry izy sady niteny tahaka ny dragona"- Apôk . 13:11. Ao amin'ny faminaniana ara-Baiboly, ny tandroka dia tandindon'ny fahefana. Tsy tahaka ilay bibidia voalohany ity anankiray ity, dia tsy manana satroboninahitra eo amin'ireo tandrony, milaza izany fa tsy mpanjaka izy. Maneho ireo fitsipika fototra roa niandohan'ny fahefan'i Etazonia sy ny fahombiazany ireo tandroka roa: ny fahafahana ara-politika sy ny fahafahana ara-pivavahana.
Vakio ny Apôk. 13:11,12. Inona ny fiovana hitanao amin'io bibidia io ary manao ahoana no fiteniny?
Miteny toy ny dragona io firenena malemy fanahy toy ny zanak'ondry io amin'ny farany. Mampiasa "ny fahefana rehetra nananan'ilay bibidia voalohany' izy (Apôk . 13:12), ary miala amin'ny fitsipiny momba ny fahafahana ara-pivavahana, ka "ny tany mbamin'izay monina eo dia asainy miankohoka eo anoloan’ilay bibidia voalohany"- Apôk. 13:12. I Etazonia no voalohany hitaky ny mponina amin'ny tany rehetra hiankohoka amin'ilay bibidia voalohany ka hanaiky ny fahefana ara-pivavahana sy ara-panjakana ananan'ny papa. Araka io faminaniana io, i Etazonia no manangana ny sarin'ny bibidia – fiombonan'ny Eglizy sy ny Fanjakana ary hotakiny ny hiankohofan'ny rehetra amin'io sary io.
Ny mahavariana dia mbola lavitra ny fananany hery ara-tafika sy ara-ekônômika izay misy azy ankehitriny I Etazonia tamin'ny vanim-potoana nanondroana azy voalohany indrindra ho fahefan'io bibidia io.
Saino ny amin'ny tsy fahamarinan-toerana ara-polifika any Amerika amin'izao fotoana izao. Ahoana no mety hitarihan'izany ho amin'ny fahatanterahan'io faminaniana io indray andro any?