NY TONTOLON-KEVITRA ARA-TANTARA
Rehefa tonga tany Egypta ny fianakavian'i Jakoba noho ny mosary tany Kanana (Gen. 46), dia nandray tsara ny Hebreo ny mpanjakan'i Egypta noho izay rehetra nataon'i Josefa ho an'ny Egyptianina.
"Ary hoy indray Farao tamin'i Josefa: Indro, efa nanendry anao hanapaka ny tany Egypta rehetra aho. Dia nesorin'i Farao ny peratra tamin'ny tanany ka nataony tamin'ny tanan'i Josefa, dia nampitafiny rongony fotsy madinika izy, ary nasiany rojo volamena ny vozony; dia nampitaingeniny teo anatin'ny kalesiny faharoa izy, ary ny vahoaka niantso teo alohany nanao hoe: Mandohaleha; ary notendreny ho mpanapaka ny tany Egypta rehetra izy." - Gen. 41:41-43.
Inona no tsiambaratelo nahombiazan'i Josefa tany Egypta na dia nanomboka tamin'ny fotoan-tsarotra aza ny fiainany tao? (Vakio ny Gen. 37:26-28 sy ny 39:2,21.)
Araka ny tantara dia i Ahmose (1570-1546 TIK) no mpanjaka vaovao resahina ao amin'ny Eks. 1:8, ilay "tsy nahalala an'i Josefa". Nanaraka azy i Amenhotep I (1546-1526 TIK), izay natahotra ny Isiraelita ka nampahory azy ireo. Avy eo, i Thutmose I (1525-1512 TIK) no namoaka didy hamonoana ny zazalahy Hebreo rehetra. Ny zanany vavy Hatshepsut (1503-1482 TIK), no ilay andriambavy nanangana an'i Mosesy ho zanany. I Thutmose III (1504-1450 TIK), izay niara-nanjaka tamin'i Hatshepsut nandritra ny fotoana voafaritra, no Farao ao amin'ny Eksodosy.
Araka ny kajikajy manakaiky ny marina indrindra, dia tamin'ny Marsa 1450 TIK no nanafahana ny zanak'lsiraely tamin'ny fanandevozan'ny Egyptianina (Jereo ny "Exodus, Date of a the, The International Standard Bible Encyclopedia, nosoratan'i William H. Shea, novokarin'i Geoffrey W. Bromiley et al., b. 2 [Grand Rapids, MI: William B. Eerdmans, 1982], tt. 230-238). Mba hahatakarana ny fotoana nitrangan'izany fanafahana izany, dia vakio ireto andininy ireto: Gen. 15:13-16; Eks. 12:40,41; Mpits. 11:26; 1 Mpanj. 6:1 (jereo koa ny Asa. 7:6; Gal. 3:16,17).
Fotoana lava no tantaraina ao amin'ny toko voalohany amin'ny Eksodosy, dia nanomboka tamin'ny andron'i Josefa, rehefa niditra tao Egypta i Jakoba rainy sy ny fianakaviany manontolo, ka hatramin'ny didy famonoana navoakan'ny Farao. Na misy tsy fitovian-kevitra aza ny momba ny isan'ireo taona naharetan'izany marina, ny zava-dehibe dia ity: na andevo tany an-tany hafa aza ny vahoakan Andriamanitra, dia tsy nanadino azy ireo Izy.
Na maro aza ny tsipiriam-piainan'ny Hebreo tany Egypta tamin'izany andro izany. izay tsy mbola fantatsika (jereo ny 1 Kôr. 13:12), ny toetran'Andriamanitra kosa dia mamirapiratra hatrany ao amin'ity boky ity, tahaka ny ao amin'ny Soratra Masina manontolo. Mahazo matoky isika fa na manao ahoana na ahoana fahasarotan'ny toe-javatra, dia eo mandrakariva Andriamanitra, ary afaka mitoky Aminy isika na inona na inona zava-miseho.