Hodinihina mandritra ny herinandro: Eks. 1:1-22; Gen. 37:26-28; Gen. 39:2,21; Asa. 7:6; Gal. 3:16,17; Eks. 2:1-25.
Tsianjery: " Ary ny Zanak’lsiraely nisento noho ny fanompoany ka nitaraina; ary niakatra tany amin’Andriamanitra ny fitarainany noho ny fanompoany. Ary Andriamanitra nandre ny fitarainany, dia nahatsiaro ny fanekeny tamin’i Abrahama sy Isaka ary Jakoba. Ary Andriamanitra dia nijery ny Zanak’lsiraely ka nahafantatra azy. " – Eks. 2:23-25.
Ny bokin’ny Eksodosy dia feno fitantarana momba ireo nampahorina, ireo voailikilika, ireo nenjehina, ireo nampiasaina tsy an-drariny, ary ireo natao tsinontsinona. Araka izany, ireo olona izay mahatsiaro ho nafoin’ny rehetra ankehitriny, nohadinoina, ary andevo, dia mety hahita fanantenana ao, satria ilay Andriamanitra namonjy ny Hebreo dia afaka mamonjy azy ireo koa.
Miresaka momba ireo ady atrehintsika eo amin’ny fiainana, ny tsy rariny sy ny fitsapana izay zary tandra vadin-koditra eo amintsika, ny bokin’ny Eksodosy. Afaka mandray fampaherezana ny tsirairay rehefa mamaky ny tantaran’ny fidiran’Andriamanitra an-tsehatra ho an’ny vahoakany mijaly. Ren’Andriamanitra ny fitarainan’ireo nampahorina, hitany ny tolona atrehin’izy ireo, voamariny ny ranomasony, ary tonga Izy, mamonjy azy ireo amin’ny fahoriany.
Raisin’Andriamanitra ho andraikiny ny manafaka ireo izay matoky Azy. Mila manaiky amim-pinoana izay atolony antsika fotsiny isika. Koa tokony hodinihina ny bokin’ny Eksodosy, satria manondro izay nataon’i Jesosy ho antsika rehetra izany. Boky momba ny fanavotana, ny fanafahana, ary ny famonjena farany io boky io — ary antsika avokoa izany amin’ny alalan’ny finoana an’i Kristy Jesosy sy izay nataony ho antsika.
Ao anatin’ny savorovoro sy ny haizina, raha mibanjina an’Andriamanitra isika, dia afaka mahatsapa ny fanatrehany, ny fikarakarany, ary ny fanampiany, eo am- pitarihany antsika ho any amin’ilay “Tany Nampanantenaina” mandrakizay.