Hodinihina mandritra ny herinandro: Apôk , 6:12-17; Mat. 24:36-44; Gen. 6:1-8; 2 Pet. 2:4-11; Gen. 18:17-32; Dan. 7:9,10
Tsianjery:
"Ary izany dia nanjo azy mba ho anatra, sady voasoratra izany ho fananarana antsika izay niharan'ny faran'izao tontolo izao. Koa izay manao azy fa efa mijoro tsara, dia aoka izy hitandrina, fandrao ho lavo." - 1 Kôr. 10:11,12.
Feno ny tantaran'ny vahoakan'Andriamanitra ny Baiboly, izay manondro toe-javatra hiseho amin'ny hoavy sy manampy antsika hahatakatra ny "fahamarinana ankehitriny." Ny sasany amin'ireo tantara ireo tokoa mantsy dia manambara mialoha izay hitranga any am-parany any amin'ny tsipiriany mahagaga, ka manome antsika fototra mivelatra kokoa hahatakarantsika mazava ireo faminaniana ao amn'ny Daniela sy ny Apokalipsy.
Hain Andriamanitra ny nifehy ny toe-java-nitranga, nefa tsy nanitsakitsaka ny fahafahan'ny tsirairay manaraka ny feon'ny fieritreretany Izy, ka nataony mifanaraka tanteraka amin'izay efa nambaran'ny mpaminany fa hitranga amin'ny andro farany izany. Mazava ny sasany amin'ireo tantara manan-danja ireo satria miresaka momba azy manokana ny Testamenta Vaovao ho fanoritsoritana ireo tranga amin'ny andro farany, toy ny tantaran'i Sodoma sy Gomora, ny Safo-drano, sns. Ny hafa kosa dia mitaky fandinihana sy fandalinana tsara mba hahazoana manatsoaka avy aminy ny fahamarinana izay nomena antsika ao amin'ny Tenin'Andriamanitra.
Handinika tantara manan-danja vitsivitsy isika mandritra ny roa herinandro manaraka, mba hahitantsika izay mety hambarany momba ny fiavian'i Kristy fanindroany, ny fitsarana famotopotorana, ny fotoan-tsarotra farany, sy ny hafa koa. Ho hitantsika eo afovoan'izany rehetra izany i Kristy satria Izy no tsy maintsy fototra sy tanjona faran'ireo faminaniana dinihintsika.
*Famerenana ny lesona ny sabata 07 Juin.