IREO FIALAN-TSINY EFATRA
Vakio ny Eksodosy 4:1–17. Inona avy ireo famantarana nomena an'i Mosesy hataony mba hanamafisana ny toerany amin'ny maha-irak'Andriamanitra azy?
Niezaka nanala tsiny ny tenany indray i Mosesy tamin'ny asa nangatahan'Andriamanitra taminy (jereo Eks. 3:11). Tsy te hankany Egypta izy hiatrika an'i Farao. Efa tsy nahomby rahateo izy tamin'ny fanandramany teo aloha, tamin'ny herin'ny tenany, hanampy ny Hebreo. Ary koa, tsy nino na nanaiky azy ho mpitarika azy ny olony. Izany no nahatonga azy namolavola fanoherana fahatelo: " 'Ahoana raha tsy mino ahy izy ireo na tsy mihaino ahy?' " (Eks. 4:1, NIV). Tsy fanontaniana hianarana zavatra vaovao izany; fanandramana handà ny andraikitra nangatahan'Andriamanitra azy horaisiny izany.
Famantarana mahagaga roa no nomena an'i Mosesy hataony eo anatrehan'ny loholon'ny Isiraely ary, tatỳ aoriana, teo anatrehan'i Farao: (1) ny tehiny niova ho bibilava ary avy eo niverina ho tehina indray, ary (2) ny tanany lasa boka nefa sitrana avy hatrany. Ireo fahagagana roa ireo dia tokony handresy lahatra ny loholona fa miasa ho azy ireo Andriamanitra. Fa raha tsy izany, dia nampiana ny fahagagana fahatelo, dia ny fanovàna rano ho ra (Eks. 4:8, 9).
Na dia nanome an'i Mosesy ireo fahagagana mahery vaika ireo aza Andriamanitra, dia mbola nanamarika fialan-tsiny hafa, ny fahefatra, izy: tsy mahay miteny izy.
Vakio ny Eksodosy 4:10–18. Ahoana no namalian'ny Tompo an'i Mosesy, ary inona no lesona azontsika raisina avy amin'izany ho an'ny tenantsika, na inona na inona toe-javatra inoantsika fa iantsoan'Andriamanitra antsika?
Ireo fialan-tsiny efatra ireo dia mampiseho ny fahasarotan'i Mosesy hanaraka ny antson'Andriamanitra. Amin'ny fanoherana "mety", dia afeniny ny tsy faniriany handeha. Ny fialan-tsiny telo voalohany dia amin'ny endrika fanontaniana: (1) Iza moa aho? (2) Iza Ianao? ary (3) Ahoana raha tsy mino ahy izy ireo? Ary ny fanoherana fahefatra dia (4) ny fanambarana: "Tsy mahay miteny aho." Novalian'Andriamanitra avokoa izany rehetra izany ary nitondra vahaolana mahery vaika. Ho an'ireo fialan-tsiny ireo dia nanolotra fampanantenana maro mampatanjaka Andriamanitra.
Avy eo i Mosesy dia nanao ny fangatahany fahadimy sy farany ary nangataka mivantana hoe: " 'Tompoko ô, mba alefaso olon-kafa kosa' " (Eks. 4:13, NRSV). Ho valiny, Andriamanitra dia nilaza taminy fa efa mandefa an'i Arona rahalahiny hitsena azy mba hanohana azy Izy. Farany, niaiky mangina i Mosesy ary nangataka ny fitahian'i Jetro alohan'ny hiaingany hankany Egypta.