ILAY MPITSARA FARATAMPONY
Vakio ny Gen. 18:25; Sal. 7:11; Sal. 50:6; Sal. 82:1; Sal. 96:10 ary ny 2 Tim. 4:1,8. Inona no ambaran'ireo toko sy andininy ireo mikasika ny toetra ara-moralin'Andriamanitra? Manampy antsika hahatakatra momba ny ady masina ny maha-Mpitsara an'izao rehetra izao an'Andriamanitra; amin'ny fomba ahoana?
Ny fahamasinan-toetran'Andriamanitra dia midika fa tsy mankasitraka ota Izy. Mahari-po tokoa Izy, nefa tsy maintsy mijinja ny vokany farany ny fahotana, dia ny fahafatesana izany (Rôm. 6:23). Nanohitra ny fahotana i Yahweh, na taiza na taiza nisy izany, na teo amin'ny Isiraely na teo amin'ireo Kananita. Tsy nahatonga ny Isiraely ho masina kokoa noho ireo firenen-kafa rehetra tsy akory ny nandraisany anjara tamin' ireo ady masina (Deo. 9:4,5; Deo. 12:29,30); na ireo firenena ireo koa aza mantsy dia nampiasain'Andriamanitra ho fitaovana nenti-nitsara io firenena voafidiny io. Tsy mitovy amin'ireo mponina tany Proche-Orient fahiny ny Isiraelita, satria izy ireo dia niharan'ny fitsimbadihan'ny ady masina, rehefa tsy niady ho azy ireo Andriamanitra fa nanohitra azy ka namela ny fahavalony hampahory azy (ampitahao amin'ny Jos. 7).
Tsy mety ho takatra ny hevitra fonosin'ny ady masina raha tsy ampifandraisina amin'ny asan'Andriamanitra amin'ny maha-Mpitsara Azy. Araka izany fomba fijery izany, dia samy hafa tanteraka amin'ny ady rehetra ny ady nataon'ny Isiraely raha naka ny tany Kanana izy ireo. Tsy tahaka ny ady atao mba hitomboan'ny harena manokana sy ny fahefana izany, izay fahita teo amin'ny tontolo fahiny (sy eto amin'ny tontolontsika ankehitriny). Ny tanjon'ny ady nataon'ny Isiraely dia tsy ny hanomezam-boninahitra azy ireo, fa ny hanorenana ny fahamarinan'Andriamanitra sy ny fiadanany eo amin'ny tany. Noho izany, ny fahatakarana momba ny ady masina dia miorina amin'ny fahatakarana ny fanapahan'Andriamanitra sy ny fiandrianany, izay mifandraika koa amin'ny maha-Mpiady Azy, tahaka ny ifandraisan'izany amin'ny maha-Mpanjaka na Mpitsara Azy.
Yahweh Mpiady, amin'ny maha-Mpitsara Azy, dia mampiorina sy manamafy ary manohana ny fitsipiky ny didy izay maneho taratra ny toetrany. Ny sary maneho an'Andriamanitra ho Mpiady, ary koa Mpitsara sy Mpanjaka, dia manamafy fa tsy azony leferina ny fikomiana atao amin'ny lamina efa napetrany hatry ny fahagola. Azontsika atao, araka izany, ny milaza fa tsy ny ady na koa ny fandresena no tanjona kendren'ny asan'i Yahweh, fa ny famerenana amin'ny laoniny ny fahamarinana sy ny fiadanana. Raha fintinina, dia iray ihany ny hoe mitsara sy miady, na koa mampanjaka ny fahamarinana, rehefa Andriamanitra no manao izany asa izany.
Saintsaino ny maha-Mpitsara marina an' Andriamanitra, izay tsy mandray tsolotra na koa mirona ho amin'ny fiangarana. Ahoana no mahatonga ny Andriamanitra Iray izay tsy handefitra na oviana na oviana manoloana ny fahotana sy ny fampijaliana ary ny fahorian'ireo tsy manan-tsiny sy ny fanararaotana ireo mijaly ho ivon'ny filazantsara?