Vakio ny Mal. 3:6 sy ny Jak. 1:17. Inona no ampianarin' ireo andalan-teny ireo antsika momba ny toetran’Andriamanitra?
Hoy Jehôvah ao amin'ny Mal. 3:6: "Fa Izaho Jehôvah dia tsy miova." Mety hisy hamaky io ampahan'andininy io ka handray ny heviny hoe tsy miova mihitsy Andriamanitra (ny asany, ny fihetsehampony); ny ampahany sisa amin'ireo andalan-teny ireo sy ny tontolon-keviny kosa anefa dia mampiseho fa ny tsy fiovaovana ambara eto dia ny tsy fiovaovan'ny toetrany sy ny fitsipiny. Asehon'ny andininy ambiny fa mety hiova Andriamanitra eo amin'ny lafiny ara-pifandraisana, satria izao no nambarany: "ary noho izany, ianareo, ry taranak'i Jakoba, dia tsy fongana" (NKJV). Ary izao no ambarany amin'ny vahoakany ao amin'ny andininy manarakaraka izany: "Miverena amiko, dia mba hiverina ho aminareo kosa Aho" - Mal. 3:7.
Araka izany, dia mifandray amin'ny voariny Andriamanitra, fifandraisana izay andraisan'ny andaniny sy ny ankilany anjara izany, kanefa eo anatrehan'izany karazam-pifandraisana izany sy ny zavatra hafa rehetra, dia tsy miova ny toetran’Andriamanitra. Voalaza ao amin'ny Jak. 1:17 koa izany, izay manambara fa avy amin'Andriamanitra ny fanomezana tsara sy tanteraka rehetra, Izy ilay tsy misy fiovaovana. Tsy Andriamanitra no fototry ny ratsy.
Averin'ny Soratra Masina eto sy any amin'ny andalan-teny hafa ny fampianarana fa tsy miova ny toetran'Andriamanitra. Raha lazaina amin'ny teny hafa, dia mampianatra mandrakariva ny Baiboly fa tsy miovaova ny fitsipi-pitondrantenan’Andriamanitra. Azony atao ny mifandray amin'ny voariny, ary manao izany tokoa Izy raha mamaly azy ireo, saingy amin'ny fitiavana sy araka ny rariny mandrakariva izany.
Vakio ny 2 Tim. 2:13 sy ny Tit. 1:2 ary ny Heb. 6:17,18. Inona no ampianarin'ireo andalan-teny ireo mikasika an'Andriamanitra?
Tsy mahazo mandà ny tenany Andriamanitra, tsy mba mandainga Izy ary manatanteraka izay nampanantenainy. Mahazo matoky isika fa Ilay Andriamanitry ny Baiboly ihany no llay Andriamanitra (ao amin'i Kristy) izay nanaiky hanolotra ny tenany ho antsika teo amin'ny hazo fijaliana. Andriamanitra azo itokiana tanteraka Izy, ary mahazo matoky sy manantena ny hoavy isika, satria hoy ny Heb. 13:8: "Jesôsy Kristy no tsy miova omaly sy anio ary mandrakizay."
Ahoana no hianaranao mitoky amin'ny fahatsaran'Andriamanitra na dia tsy mizotra araka ny tokony ho izy fa miharatsy aza ny toe-javatra eo amin'ny fiainanao? Ahoana no anampian'ny fieritreretanao an'Andriamanitra teo amin'ny hazo fijaliana anao hianatra hitoky amin'ny Fahatsarany?