Hodinihana mandritra ny herinandro: Mar. 8:11,12; Mat. 15:21-28; Lio. 7.1-10; Efes. 2:8; Heb. 11; Apôk. 14:12.
Tsianjery: "Ary ny finoana no fahatokiana ny amin'ny zavatra antenaina, fanehoana ny zavatra tsy hita." - Heb. 11:1.
Nisy olona nilaza toy izao indray mandeha: "Ny finoana dia toy ny WiFi. Tsy hita maso izy, saingy manana hery mampifandray anao amin'izay ilainao." Tsy isalasalana fa raha tsy misy ny finoana, dia tsy hisy ny fifandraisana amin'Andriamanitra.
Manao ahoana ny finoanao ankehitriny? Efa nisy fotoana ve nihozongozona ny finoanao an'Andriamanitra? Angamba efa nandalo ady sarotra ianao izay tsy nahafantaranao intsony ny fomba hirosoana eo amin'ny fifandraisanao amin'Andriamanitra. Sa ve ny finoanao tahaka ny raozy mamony amin'ny tahony maitso, izay mivelatra tsikelikely ho tonga voninkazo marevaka sy mahafinaritra, ka mameno ny efitrano misy azy amin'ny hanitra tsy hay hadinoina? Satria marina tokoa fa "ny finoana no fahatokiana ny amin'ny zavatra antenaina, fanehoana ny zavatra tsy hita." — Heb. 11:1. Tsy zavatra azontsika amboarina amin'ny herin'ny tenantsika izany, satria "finoana izay nozarain'Andriamanitra ho anareo avy" - Rôm. 12:3. Ny finoana dia fanomezana avy amin'Andriamanitra (Efes. 2:8,9), ary tsy afaka mino an'Andriamanitra isika raha tsy noho ny zavatra efa ataon'Andriamanitra ao anatintsika sy ho antsika. Andeha hodinihintsika amin'ity herinandro ity ny tohahevitra momba ny finoana: inona no hatao amin'ny fisalasalana sy ny tsy finoana? Araka ny fijerin'i Jesôsy, toy ny ahoana izany finoana matanjaka izany; ary inona no hevitry ny hoe manana "finoana an'i Jesôsy "?