Vakio ny IFM, toko 73: "Aza malahelo ny fonareo".
"Napetraka hotehirizin'ny vahoaka hebreo tahaka ny harena sarobidy ny fahamarinana. Ny fombam-pivavahana izay mitondra ny sonian'ny lanitra dia naorin'i Kristy mihitsy. Voasarona lamba tao amin'ny sary an'ohatra sy ny tandindona ireo fahamarinana lehibe momba ny fanavotana. Nefa rehefa tonga i Kristy dia tsy neken'ny Jiosy ho Ilay notondroin’ireo tandindona ireo Izy. Teo am-pelatanan'izy ireny ny Tenin’Andriamanitra, nefa ireo lovan-tsofina izay nafindra avy teo an-tanan'ny taranaka iray ho eo amin'ny taranaka iray, sy ny fandraisan'ny olombelona ny Soratra Masina, dia nanakona taminy ny fahamarinana, araka izay tao amin'i Jesôsy. Very ny maha-zava-dehibe ara-panahy ny Soratra Masina. Nivoha ho azy ireny ny trano fitehirizana ny haren'ny fahalalana rehetra, nefa tsy fantany izany."
"Tsy manafina ny fahamarinany amin'ny olona Andriamanitra. Ny fomba fihetsik'izy ireo ihany no mahatonga izany ho maizina aminy. Nanome porofo miharihary ny maha-Mesia Azy tamin'ny vahoaka jiosy i Kristy; nefa nitady fiovana hentitra teo amin'ny fiainan'izy ireo ny fampianarany. Hitany fa raha mandray an'i Kristy izy, dia tsy maintsy mahafoy ireo ohabolana sy ireo lovan-tsofina maminy indrindra, ireo fahazarana feno fitiavan-tena sy tsy araka an'Andriamanitra fanaony. Mitaky fahafoizan-tena ny handraisana ity fahamarinana tsy miova sy maharitra mandrakizay ity. Noho izany dia nakimpiny ny masony tsy hahita ireo porofo miharihary tsy azo ialana azon'Andriamanitra nomena mba hampiorina ny finoana an'i Kristy. Nilaza ho mino ny Soratra Masina ao amin'ny Testamenta Taloha izy, nefa nandà ny hanaiky ny teny vavolombelona voarakitra ao momba ny fiainan'i Kristy sy ny toetra amam-panahiny. Natahotra ny ho resy lahatra izy sao ho voaova fo ka ho voatery hamoy ireo hevitra efa nibahana tao an-tsainy. Teo aminy Ilay haren'ny Filazantsara, Ilay Làlana sy Fahamarinana ary Fiainana nefa nolaviny, dia Ilay fanomezana lehibe indrindra azon'ny lanitra natolotra." - HF, tt. 78,79.
FANONTANIANA hifanakalozan-kevitra
1. Tanteraka teo amin'ny fiainan'i Jesôsy ny faminaniana, ary mampiorina ny finoantsika izany; amin'ny fomba ahoana?
2. Inona ireo sakana telo na efatra lehibe nahatonga ireo mpitondra fivavahana tsy hino an'i Jesôsy? Amin'ny fomba ahoana no isehoan'ny toe-javatra toy izany koa ankehitriny?
3. Manaova fandinihan-tena ka fantaro hoe inona avy no itokianao ankehitriny. Inona no azonao atao mba hanamafisanao ny finoanao?
4. Manao ahoana ny fahefan'ny Soratra Masina araka ny namalianao ny fanontaniana tany amin'ny faran'ny lesona Alatsinainy? Ary nahoana no tsy maintsy lavintsika izay rehetra manozongozona ny fahefan'ny Soratra Masina, izay fahefana farany sady faratampony?