Vakio ny Kol. 1:24,25. Inona no lazain'i Paoly momba ny fiaretany fahoriana noho ny amin'i Kristy?
Na dia fony izy gadra tao anaty trano tany Rôma aza no nanoratan'i Paoly ny bokin'ny Kolosiana, dia inoana fa ny tsy fahafahany niasa fatratra tamin'ny toerana samy hafa sy nitety tokantrano, tahaka ny nataony taloha, no fahoriana lehibe indrindra ho azy (Asa. 20:20). Ireo fahoriana ireo, izay efa nampitandreman'i Kristy mialoha (Mat. 24:9; Jao. 16:33), dia «tsy tokony hoharina amin'ny voninahitra izay haseho amintsika» Rôm. 8:18. Mihamazava ny resaka eto. Tahaka ny nosoratany ho an'ny Kristianina tany Filipy, dia mifaly noho ny fiaretany fahoriana izy ankehitriny, izay ho tombontsoan'izy ireo (Kol. 1:24).
Tao am-ponja i Paoly, «nefa ny tenin'Andriamanitra dia tsy mba voafatotra" -2 Tim. 2:9. Nandritra ny fotoana naha mpifatotra azy no nanoratana koa ny Filipiana sy ny Efesiana ary ny Filemona. Taorian'ny namotsorana azy, dia nanindry mandry azy Andriamanitra mba hanoratra ireo torohevitra manan-danja ao amin'ny 1 Timoty sy Titosy. Avy eo, rehefa nogadraina farany tany an-tranomaizina romanina izy, dia nanoratra ny 2 Timoty. Raha fintinina, nanome fahafahana an'i Paoly hanoratra ny ampahany lehibe amin'ny TV ireo taona farany ireo, ary mety anisan'izany koa ny Hebreo.
Nahafaoka izany rehetra izany sy ny maro hafa ny drafitra mandrakizain Andriamanitra. Ny teny grika nampiasaini Paoly ao amin'ny Kôl, 1:25, izay nadika hoe fitondrana» dia oikonomia, Rehefa ampiasaina amin'ny heviny voafetra (toy ny ao amin'ny 1 Tim. 1:4) io teny io, dia midika hoe «ny fomba fandaminan Andriamanitra ny zavatra.» - Luke Timothy Johnson, The First and Second Letters to Timothy (New York: Doubleday, 2001), t. 164. Tafiditra ao anatin'izany ny maha apostoly an'i Paoly. Fa amin'ny heviny mivelatra kokoa, dia tafiditra ao ny fanomanan'Andriamanitra manontolo ny drafi-panavotana. Ny asan'i Paoly sy ireo apostoly hafa, ary na ny asan'ireo mpaminany taloha aza (Efes. 2:20; Efes. 3:5), anisan'izany i Mosesy, dia natao «hahatanteraka ny fitoriana ny tenin Andriamanitra» - Kol. 1:25; mifandray amin'io drafitra masina io izany rehetra izany.
Handinika akaiky kokoa ity lohahevitra ity isika ao amin'ny lesona rahampitso; na izany aza, ilaina ny manamarika dieny izao ny fiaiken'i Paoly fa ampahany kely monja amin'ny drafitra masina sy lehibe lavitra izay natomboka «hatrizay nanorenana izao tontolo izao» ny asa fanompoany (Mat. 13:35; Efes. 1:4).
Hevero ny fiainanao manokana. Ahoana no mety hampifanaraka ny fanapahan-kevitra raisinao (na lehibe na kely) amin'ny drafitra lehiben’Andriamanitra? Mety ho fantatsika marina ve ny tena hakely na halehiben'ny fanapahan-kevitra iray? Ahoana no mety hahazoana vokatra lehibe kokoa avy amin'izany, izay tsy ho hita raha tsy aty aoriana?