Nanota i Adama sy i Eva ary nolazain’Andriamanitra fa tsy maintsy ilaozany ny saha Edena fonenany. Manomboka izao dia ny fisasarana sy ny fijaliana no ho anjarany. Tsy maintsyhijaly sy ho faty ao anatin’ny tsy fananam-panantenana ve izy ireo? Ny fahafatesana ve no faran’ny zavatra rehetra?
Tamin’io fotoana io no nanomezan'Andriamanitra azy ireo ilay teny fikasana voalaza ao amin’ny Gen. 3:15; nitodika mivantana tamin'i Satana, ilay menarana, Izy ka nanao hoe: “Dia hampifandrafesiko hianao sy ny vehivavy ary ny taranakao sy ny taranany: izy hanorotoro ny lohanao, ary hianao kosa hanorotoro ny ombelahin-tongony”'. Mety tsy takany tanteraka ny hevitr'izany tamin’io fotoana io saingy fantany fa afaka manantena indray izy. Avy amin’ny “taranaky ny vehivavy” no hiavian’ny fanavotana azy ireo, na inona na inona fomba hahatanterahan’izany.
Azo antoka fa i Jesôsy Kristy ilay “taranaky ny vehivavy” (Gai. 3:16). Teo amin’ny hazo fijaliana no nanorotoroan'i Satana ny ombelahin-tongony. Saingy ny fandresen'i Jesôsy no ahazoantsika antoka fa indray andro any dia ho voatorotoro ny lohan’ny menarana ary hikatona ny varavaran’ny fijaliana sy ny fahafatesana izay nosokafan’i Adama sy i Eva.
Vakio ny Heb. 2:9, Gal. 3:13, sy ny 2 Kôr. 5:21. Inona no ambaran'ireo andininy ireo antsika momba ny halehiben'ny sorona nataon'i Kristy teo amin’ny hazo fijaliana?
Efa nanontany tena ve ianao raha tena tia anao marina Andriamanitra? Jereo ny hazo fijaliana; jereo ny satro-tsilo, jereo ireo fantsika teo amin’ny tanany sy ny tongony. Hoy Andriamanitra isaky ny indray mitete amin’ny ra nalatsak’i Jesôsy teo Kalvary: “Tiako ianao. Tsy tiako ny ho any an-danitra tsy misy anao. Eny, nanota ianao; namidinao ho eo am-pelatanan'ny fahavalo ny tenanao; eny, tsy mendrika ny fiainana mandrakizay ianao. Naloako anefa ny onitra mba hamerenana anao.” Rehefa mibanjina ny hazo fijaliana ianao dia tsy hanontany tena intsony ianao raha tiana na tsia.
Miresaka ny amin’i Jesôsy izay tonga teto amin’ity tany ity, nandalo fahoriana, fahadisoam-panantenana, sy fanaintainana tahaka ny olombelona rehetra ny Baiboly. Kristy niatrika fakam-panahy tahaka antsika no ambaran’ny Baiboly – Kristy nandresy ireo fanapahana sy ny herin’ny helo teo amin’ny fiainany sy tamin’ny alalan’ny fahafatesany teo amin’ny hazo fijaliana – izany rehetra izany, ho an'ny tsirairay avy amintsika, isam-batan’olona.
Saino ity: I Jesôsy, ilay namorona izao tontolo izao (jereo ny Jao. 1:3) no nidina avy any an-danitra, ary tsy vitan’ny tonga teto amin’ity tontolo lavo ity ihany fa nijaly tamin’ny fomba izay tsy hanjo na iza na iza amintsika na oviana na oviana (jereo ny Isa. 53:1-5). Nataony izany satria tiany isika, dia ny tsirairay avy amintsika. Antony lehibe mitondra fanantenana manao ahoana re izany!
Ahoana no namalian’i Kristy teo amin’ny hazo fijaliana ireo fia mpangana nataon'i Satana? Amin’ilay ady lehibe ifanandrinan'ny tsara sy ny ratsy. Inona no notanterahin’ny fahafatesany?