Hodinihina mandritra ny herinandro: Mar. 10; Gen. 1:27; Gen. 2:24; Gal. 4:1,2; Rôm. 6:1-11; Isa. 11:1-16.
Tsianjery: "Fa ny Zanak'olona tsy tonga mba hotompoina, fa mba hanompo ka hanolotra ny ainy ho avotra hisolo ny maro."- Mar. 10:45.
Mifantoka amin'ny Mar. 10 ny lesona amin'ity herinandro ity, izay mifameno amin'ilay fizarana nanofanan'i Jesôsy manokana ny mpianany ho fanomanany azy ireo hiatrika ny hazo fijaliana. Saika ny antsasaky ny Mar. 10 no miresaka momba ny mpianatra manokana, ary ny ambiny kosa miresaka ny amin'ireo lohahevitra manan-danja momba ny maha-mpianatra saingy amin'ny alalan'ny fomba fijerin'ireo olon-kafa nifanerasera tamin'i Jesôsy. Tonga ny Fariseo miady hevitra Aminy momba ny fisaraham-panambadiana. Mitondra ny zanany ho eo amin'i Jesôsy ny ray aman-dreny mba hotsofiny rano. Manontany Azy momba ny fiainana mandrakizay ny lehilahy manan-karena iray, ary mangataka mba hampahiratiny ny jamba iray.
Ahitana fampianarana manan-danja ny Mar. 10 momba ny atao hoe manaraka an'i Jesôsy, indrindra satria mifandray amin'ny fiainantsika amin'izao fotoana izao izany: ny fanambadiana, ny zanaka, ny toerana tokony homentsika ny vola, ary ny valisoa sy ny sandan'ny fanarahana Azy. Ny nanasitranana ilay lehilahy jamba faharoa (ampitahao ny Mar. 10:46-52 sy ny Mar. 8:22-26) no mamarana azy, izay maneho amin'ny fomba mazava tsara ny sandan'ny fanarahana an'i Jesôsy sy ny hiafaran'izany.
Ireo lesona rehetra ireo dia manomana ny mpanara-dia an'i Jesôsy - na ireo mpianany tamin'ny 2000 taona lasa na ireo mpianany aty amin'ny taonjato faha-21 - ho amin'ny fotoan-tsarotra eo amin'ny fiainana maha-mpianatra.