Vakio ny Dan. 7:23-25 sy ny Apok. 12:6, 14. Vanim-potoana ara-paminaniana manao ahoana no resahin'ireo andininy ireo?
Tezitra i Satana rehefa mitoetra ho mahatoky amin'Andriamanitra ny olony. Manaraka aorian'izany matetika ny fanenjehana. Ny mpaminany Daniela dia nanondro vanim-potoana iray mbola ho avy, izay "hiadiana" sy "hanenjehan"'ny fiangonan'ny Vanim-potoana Antenantenany ny vahoakan'Andriamanitra (Dan. 7:21,25). Ny mpaminany Jaona dia nanondro io vanim-potoana io koa ho fotoana nanerena ny fiangonan'Andriamanitra handositra any an'efitra izay "itaizana azy fetr'andro iray sy fetr'andro roa ary antsasaky ny fetr'andro"- Apôk. 12:14. Hoy koa ny Apok. 12:6: "Ary ravehivavy kosa nandositra nankany an-efitra, izay nisy fitoerany namboarin'Andriamanitra". Novelomin'Andriamanitra tany an'efitra ny vahoakany. Nampahery sy nanohana azy ireo ny Teniny, raha nivaivay nandritra io vanim-potoana lava sy manjombona nanjakazakan'ny papa io ny fifanandrinana lehibe. Nahita "toerana voaoman'Andriamanitra ho azy ny olon'Andriamanitra. Ao anatin'ireo fihaikana lehibe indrindra amin'ny fiainana dia manomana toerana ho an'ireo mahatoky Aminy mandrakariva Andriamanitra.
Nahita fialofana tao amin'ny Fitiavany sy ny Fiahiany ny vahoakany nandritra ireo fotoam-pitsapana lehibe indrindra (jereo ny Sal. 46).
Ireo 1260 andro sy ny fetr'andro iray sy fetr'andro roa ary ny antsasaky ny fetr'andro ao amin'ny Apôk. 12:6,14 dia milaza vanim-potoana iray ihany (fetr'andro 3 sy 1/2 na taona x 360 andro/taona = 1260 andro). Amin'ny endrika tandindona matetika no anoratana ny faminaniana ao amin'ny Baiboly. Ao amin'ny lahatsoratra ara-paminaniana ao amin'ny Daniela sy ny Apokalipsy, ny iray andro ara-paminaniana dia midika ho taona iray ara-bakiteny. Hitantsika ao amin'ny Nom. 14:34 sy ny Ezek. 4:6 io fitsipika andro-taona io.
Tsy mijanona amin'ireo andininy roa ireo ihany ny fitsipika andro-taona fa amin'ny fototra ara-tSoratra Masina mivelatra kokoa. Ny Dr William Shea, manam-pahaizana momba ny vanim-potoana sy ny Testamenta Taloha dia maneho porofo ara-Baiboly 23 andalana ao amin'ny Testamenta Taloha momba io fitsipika io. Nampiasa izany nandritra ny taonjato maro ireo mpandinika ny Baiboly.
Ireo Wisigoth, Vandale ary ireo Ostrogoth dia foko izay nino ny foto-pampianarana hafa ivelan'ny fampianarana ofisialin'i Roma. Nanomboka ny 1260 andro tamin'ny fotoana nandroahana tao Rôma ny farany tamin'ireo foko barbarianina, ny Ostrogoth, tamin'ny taona 538 TrK. Nitohy hatramin'ny taona 1798 io vanim-potoan'ny haizina ara-panahy io, fotoana izay nanesoran'ny jeneralin'i Napoleon (Berthier) ny papa tsy ho ao Rôma. Kristianina maro no maty maritiora nandritra io vanim-potoana lavabe io vokatry ny fankatoavany ny Tenin'Andriamanitra. Nandresy izy ireo na dia tao anatin'ny fahafatesana aza. Tao amin'i Kristy dia nafahana tamin'ny fahamelohana sy ny fanjakan'ny ota izy ireo ka nandresy "noho ny amin'ny ran'ny Zanak'ondry. Ny fandresen'i Kristy an'i Satana teo amin'ny hazo fijaliana no fandresen'izy ireo. Na maty aza izy ireo, ny fahafatesany dia fitsaharana fotsiny ihany mandra-piverin'i Kristy.
Ahoana no nanamafisan'ny fahatanterahan'ireo faminaniana ara-Baiboly ny finoanao?