Noho i Môrdekay sy i Estera nonina tany amin'ny firenen-kafa, dia tsy maintsy ho tojo olana izy ireo na ho ela no ho haingana raha maniry ny hitoetra ho mahatoky amin' Andriamanitra. Azo antoka tokoa fa izany no nitranga tamin'i Môrdekay.
Vakio ny Est. 3:1-15. Inona no nitranga eto, ary inona no anton'izany?
Hitantsika ao amin'ny Est. 3 fa nanome voninahitra an'i Hamana ny mpanjaka Kzersesy (Ahasoerosy) ary nanome azy toerana ambony feno fahefana. Nomena baiko ny hiankohoka amin'i Hamana ny olon-drehetra. Saingy izao no vakintsika: "Fa Mordekay kosa tsy mbanety nandohalika na niankohoka" - Est. 3:2. Tsy omen'ny Baiboly ny antony tsy nandohalehan'i Mordekay tamin'io lehilahy io, saingy fantatsika ny anton'izany: Jiosy mahatoky izy.
Tsy tian'i Môrdekay ny hiankohoka amin'ny taranak'i Agaga, Amalekita, fahavalon'ny fireneny hatramin'ny fotoam-panafahana tany Egipta (Deo. 25:19). Ahoana no handohalehan'ny Jiosy mahatoky iray eo anoloan'ny Amalekita? Ahoana no hiankohofany amin'olona hafa, afa-tsy amin' Andriamanitra ihany?
"Dia hoy ny mpanompon'ny mpanjaka izay teo am-bavahadin'ny mpanjaka tamin'i Mordekay: Nahoana hianao no mandika ny didin'ny mpanjaka?" - Est. 3:3. Na dia tsy haintsika an- tsipiriany aza ny fomba namaliany izany, dia ambaran'ny andininy manaraka fa "efa nilaza tamin'ireo izy fa Jiosy"-Est. 3:4. Ao amin'io valinteny io, dia azo antoka fa nanana fotoana hanazavana i Môrdekay fa amin'ny maha mpivavaka amin' Andriamanitra izay namorona ny lanitra sy ny tany azy dia tsy afaka ny hiankohoka amin'ny olombelona mpanota izy. Tsy isalasalana fa amin'ny lafiny iray dia afaka nijoro ho vavolombelona ny amin'ny finoany i Mördekay, finoana izay nifikirany mafy ka nampidi-doza azy, ary indrisy fa nampidi-doza ny hafa koa.
"Fahazavana lehibe no namirapiratra avy tamin'i Daniela sy ireo namany ary i Môrdekay, teo anivon'ny haizina ara- pitondran-tena nanjaka tao amin'ny lapan'ny mpanjakan'ny Babilôna." -ARSH, 13 Mey, 1884.
Raha naniry ny hamotika ireo vahoaka jiosy i Hamana dia izao no nolazainy momba azy ireo: "Misy firenena iray efa miely sy mihahaka eny amin'ny firenena samy hafa isan-tokony eran'ny fanjakanao; ary hafa lalana noho ny firenena rehetra ireny sady tsy mba mankato ny lalàn'ny mpanjaka" Est. 3:8. Vahoaka izay tsy mitovy fomba amam-panao ary tsy mankato ny lalan'ny mpanjaka hoe? Antony tonga lafatra hahatonga fanenjehana izany.
Amin'ny fomba ahoana, na dia amin'izao fotoana izao aza, no mety hitsapana antsika tahaka an'i Môrdekay? Ahoana no tokony hataontsika eo anatrehan'izany?