Hodinihina mandritra ny herinandro: Asa. 13:1-5,13; Asa. 15:36-39; Mar. 1:1-15; Isa. 40:3; Dan. 9:24-27.
Tsianjery: "Ary rehefa voasambotra Jaona, dia nankany Galilia Jesôsy nitory ny filazantsaran’Andriamanitra ka nanao hoe: Efa tonga ny fotoana ka efa akaiky ny fanjakan'Andriamanitra; mibebaha hianareo ka minoa ny filazantsara." - Mar. 1:14,15.
Iza moa no nanoratra ny filazantsaran'i Marka, ary nahoana izany no nosoratana? Tsy misy na iray amin'ny filazantsara aza manonona ny anaran'ny mpanoratra azy. Ao amin'ny filazantsaran'i Jaona izao no mety ho azo veroka indrindra izany, noho ilay filazana hoe: "ny mpianatra izay tian'i Jesosy" (jereo ny Jao. 21:20,24).Kanefa hatrany am-piandohana, ireo boky nekena ho Filazantsara dia na mifandray amin'ny apôstôly iray (Matio, Jaona), na amin'ny mpiara-dia amin'ny apôstôly iray. Ohatra, ny filazantsaran'i Lioka dia mifandray amin'i Paoly (jereo ny Kôl. 4:14; 2 Tim. 4:11; Filem. 1:24), ary ny filazantsaran'i Marka dia mifandray amin'i Petera (jereo ny 1 Pet. 5:13).
Na dia tsy manonona ny anarany mihitsy aza ny mpanoratra ny Marka ao amin'ilay boky, ny lovan-tsofin'ny fiangonana voalohany dia milaza fa i Jaona Marka no nanoratra ny filazantsaran'i Marka, izay mpiara-dia amin'i Paoly sy i Barnabasy, nanampy azy ireo tsindraindray (Asa. 13:2,5), ary tatỳ aoriana, niaraka tamin'i Petera (1 Pet. 5:13).
Mandritra ity herinandro ity dia hijery ny amin'i Marka aloha isika, dia ny tsy fahombiazany sy ny nahatafarina azy nony farany, araka ny voatantara ao amin'ny Soratra Masina. Avy eo dia hiompana amin'ny fandinihana ny ampahany voalohany amin'ny bokiny, ka amin'izany dia sady hitazana any aloha isika, any amin'izay tian'ny tantara hahatongavana, no hitodika any amin'ny lasa koa, hahita ny antony nanosika ity misiônera lavo sy mba tafarina ity hanoratra boky toy izao.