"Ary raha zanaka, dia mpandova; eny, sady mpandova an'Andriamanitra no mpiray lova amin'i Kristy koa, raha miara-miaritra aminy isika mba hiara-manam-boninahitra aminy koa." — Rôm. 8:17.
Mofon’aina:
Ny herin'ny fahasoavana dia hanalefaka ny fo, hanadio sy hamotsy ny ao anaty, ka fahaiza-mitondra sy fahaiza-miaina avy any an-danitra no homeny antsika. Tsy ho mpanandra-tena ny Kristianina satria tsy toetran'i Kristy izany. Hoy ny Mpanavotra izao tontolo izao, Ilay nisolo ny mpanota sy aro ho azy: "Mankanesa aty amiko, hianareo rehetra izay miasa fatratra sy mavesatra entana, fa Izaho no hanome anareo fitsaharana." — Mat. 11:28.
Aoka anefa tsy hohadinointsika fa i Jesôsy Ilay malemy fanahy sy tsy miavona am-po dia manana ny toe-tsaina sy ny tanjon'ny mpandresy. (...) Izay tia ny Tompo Jesôsy amin'ny fo marina sy mahitsy dia ho tia ireo izay namoizan'i Kristy ny ainy mba hovonjena, ary hanararaotra ny fotoana rehetra hiasana ho an'i Kristy amin'ny maha-mpianany azy.
Amin'ny maha-zanakalahy sy zanakavavin'Andriamanitra, izay mpiara-miasa amin'i Jesôsy Kristy sy manana tanjona mendrika, no tsy maintsy itondrantsika ny fiainantsika. Misolo tena an'i Jesôsy Kristy isika amin'ny toetra asehontsika, ary natao hanompo Azy amin'ny fo tsy mizarazara (...) ka Ilay ivo lehibe iorenan'ny fanantenantsika ny fiainana mandrakizay sy ny fahasambarana dia hitondra antsika ho amin'ny firaisan-tsaina sy ny firindrana tanteraka. (...)
Aoka ny fiainantsika ankehitriny hiainantsika amim-pinoana an'i Kristy. Raha mpanara-dia an'i Kristy isika dia tsy ho asa soa kely tsindraindray, arakaraky ny toe-javatra sy ny manodidina — fihetsika ao anatin'ny fahataitairana, izay maneho fa ny fihetseham-po no mibaiko antsika, fifandirana madinidinika, fitsiriritana, fialonana, ary fitiavan-tena, no mandrafitra ny fiainantsika. Tsy mifanaraka velively amin'ny fiainana lavorarin'i Jesôsy izany, ary tsy ho mpandresy isika raha mbola manana ireo fahalemena ireo. (...)
Eo am-piatrehanao ireo trangam-piainana samihafa, ka tojo teny izay nokendrena mihitsy mba hanindrona sy handratra ianao, dia ataovy hoe: "Zanak'Andriamanitra aho, mpiray lova amin'i Jesôsy, mpiara-miasa amin'Andriamanitra. Koa tsy azoko atao ny manana sain-dratsy, mora tohina, tsy mihevitra afa-tsy ny tenako (...). Nomen'Andriamanitra asa hotanterahina aho; aoka aho ho mendrika ny andraikitra nankininy tamiko." — UL, t. 36.