"Finoana no nivahiniany tany amin'ny tany nolazain'ny teny fikasana, toy ny any an-tanin'olona, mitoetra an-day, mbamin'Isaka sy Jakoba, mpiara-mandova izany teny fikasana izany aminy; fa nanantena hahazo ny tanana misy fanorenana izy, Andriamanitra no Tompo-marika sy Mpanao izany." - Heb. 11:9,10.
Mofon’aina :
Niakatra ho amin'ny Ray i Jesôsy mba hisolo tena ny olombelona, ary izay maneho ny endriny dia hoentin'Andriamanitra miaraka Aminy mba hibanjina ny voninahiny sy hiombom-boninahitra Aminy. Misy fitoerana voavoatra ho an'ireo mpivahiny teto an-tany. Misy fitafiana, satro-boninahitra ary mari-pankasitrahan'ny fandresena ho an'ny olo-marina. Any amin'ilay tontolo ho avy dia hazava tsara amintsika izay rehetra nanahiran-tsaina antsika na saro-takarina teo amin'ny fitondran' Andriamanitra. Hovelarina eo anoloantsika ny tsiambaratelon'ny fahasoavana. Raha tsy nahita afa-tsy savorovoro sy fahadisoam-panantenana ny saintsika voafetra teo aloha, dia hahita firindrana mahafinaritra kosa. (...)
Tsy misy fahoriana any amin'ny rivo-piainan'ny lanitra. Tsy misy ranomaso any amin'ny fonenan'ireo voavotra, tsy misy fitanjozoran'ny mpandevina, tsy misy mariky ny fisaonana. "Tsy misy amin'ny mponina ao hilaza hoe: Marary aho; ny olona izay mitoetra ao dia voavela heloka" - Isa. 33:24. (...) Saintsaino izany ka ambarao amin'ireo zanaky ny fahoriana sy ny alahelo, ary asao izy hiravoravo amin'ny fanantenana.
Arakaraka ny anakekezantsika Azy no ahatazanantsika ny hadion'ny toetrany sy ny fahaleliibiazany, sy hitomboantsika amin'ny fanetren-tena. Arakaraka ny itiavantsika an'i Jesôsy no hahatonga ny "izaho" hietry ka ho hadino tanteraka. (...)
Izay malemy fanahy sy madio indrindra ary tsotra tahaka ny zaza no hohatanjahina ho amin'ny ady; hohatanjahina fatratra amin'ny Fanahiny ny toe-panahiny. Izay mahatsapa ny fahalemeny ka mitolona amin'Andriamanitra toa an'i Jakoba, mitalaho hoe: "Tsy havelako handeha Hianao, raha tsy tahinao aho", no handroso ao amin'ny famelombeloman'ny Fanahy Masina. Ho voahodidin'ny rivo-piainan'ny lanitra izy, handehandeha hanao soa, ho hery lehibe hanohana ny fivavahan'i Kristy ny asany. (...)
Vonona hamonjy antsika ao anatin'ny fotoan-tsarotra ny Andriamanitsika. Fantany tsara ny miafina indrindra ao amin'ny saina sy ny fontsika (...). Rehefa ao anatin'ny fahaverezan-kevitra isika, na tsy mbola namboraka ny olantsika akory aza isika, dia efa namolavola fomba hanafahana antsika Izy. - UL, t. 46.