«Ary Mosesy sy ny Zanak'Isiraely dia nihira izao fihirana izao ho an’i Jehôvah ka nanao hoe: Hihira ho an’i Jehôvah aho, fa avo indrindra Izy; ny soavaly sy ny mpitaingina azy efa nariany ao amin’ny ranomasina. Jehôvah no heriko sy fiderako, fa efa famonjena ahy Izy; izao no Andriamanitro, ka hankalaza Azy aho, dia Andriamanitry ny razako, ka hanandratra Azy aho. » Eks. 15:1,2.
Mofon’aina:
Nisandratra toy ny firaondraonan’ny ranomasina izany hira mahafinaritra nohirain’ny olon-drehetra izany. Namakivaky ny ranomasina sy ny tany foana ny akony fa natosiky ny tendrombohitra manodidina niverina. (...)
Namela marika tsy azo kosehina tao an-tsain’ny vahoaka hebreo io hira io sy ny fanafahana lehibe izay tsiahiviny. Nohirain’ny mpaminany sy ny mpanao tonon-kira teo amin’ny Isiraely izany nandritra ny taonjato nifandimby mba hitory fa Jehôvah no hery sy fanavotana ho an’izay olona mialoka Aminy. Tsy natokana ho an’ny firenena jiosy irery io fihirana io. Manambara ny fandresena farany izay ho azon’ny Isiraelin’Andriamanitra sy ny fandevonana ny fahavalon’ny fahamarinana rehetra amin’ny andro ho avy koa izany. Ny mpaminany tao Patmô dia nandre ny mpandresy niakanjo fotsy lava sy nitana ny lokangan’Andriamanitra teo ambonin’ny ranomasina fitaratra miaro afo, «nihira ny fihiran’i Mosesy, mpanompon’Andriamanitra, sy ny fihiran’ny zanak’ondry» (...)
Izany no hevitra raketin’ny fihiran’i Mosesy ka tokony hanetsika ny olona rehetra izay tia sy matahotra an’Andriamanitra koa. Nanao fanavotana lehibe lavitra noho izay nataony ho an’ny Hebreo teo amoron’ny Ranomasina Mena Andriamanitra, raha nanafaka antsika tamin’ny fanandevozan’ny ota. (...) Aoka hidera an’i Jehôvah sy ny zava-mahagaga vitany amin’ny feo mafy vokatry ny fo. Hanandratra ny feony hanao hira fiderana ireo izay mihevitra ny famindrampo miezinezina nataon’i Jehôvah, nefa koa tsy hanadino ireo fanomezam-pahasoavana madinika nomeny. Tokony hataontsika antom-pîsaorana tsy tapaka ny soa raisintsika isan’andro avy Aminy, ary ambonin’ireny rehetra ireny ny fahafatesan’i Jesôsy izay nahazoantsika nandray ny fahasambarana sy ny rivo-piainan’ny lanitra. Fangoraham-po manao ahoana loatra, fitiavana tsy takatry ny saina manao ahoana re no asehon’Andriamanitra antsika tamin’ny nanaovany antsika (...) ho anisan’ny ankohonany, sy nanaovany antsika ho antoky ny fitahiany sy ny fifaliany! – PM, tt. 272,273, ed. 2014.