"Ahoana ary? Moa tsy fantatrareo fa ny tenanareo dia tempolin’ny Fanahy Masina, Izay ao anatinareo sady efa azonareo tamin’ Andriamanitra? Ka tsy tompon’ny tenanareo hianareo." - 1 Kôr. 6:19.
Mofon’aina:
Harena Iehibe ny fahasalamana. lo no fananana sarobidy indrindra ananan’ny olombelona mety maty. Katsahin'ny olona fatratra ny fananana materialy, ny voninahitra sy ny fahalalana, na dia hamoizany ny fahasalamany aza izany. Tsy misy amin'izy ireny anefa afaka hiantoka fahasambarana raha tsy eo ny fahasalamana. Fahotana lehibe ny fanimbazimbana ny fahasalamana izay nomen Andriamanitra antsika. Ny fanimbazimbana rehetra atao amin'ny fahasalamana dia mandemy antsika sy hananantsika fatiantoka na dia mahazo fahalalana be aza isika. (...)
Noho ny antony maro, ny fahantrana dia fitahiana; satria izany dia miaro ny tanora sy ny ankizy tsy hidonana-poana. (...) Ny zavatra voalohany izay tokony hokatsahin'ny ray aman-dreny mandrakariva dia ny hananan’ny zanany vatana tomady, mba ho lehilahy sy vehivavy matanjaka izy ireo any aoriana. Tsy ho tratra na oviana na oviana izany tanjona izany raha tsy misy fampiasam-batana atao.
Mahatsara ny ankizy, ara-batana sy ara-moraly, ny hampianarana azy hiasa, na dia tsy ho fitadiavam-bola aza izany. Mba hananan’ izy ireo toetra madio sy mendrika dia tsy maintsy ataony ho fitsipi-piainany ny asa vatana voarindra izay hampatanjaka ny hozatra rehetra amin'ny tenany. (...)
Tsy misakana ny hikolokoloana ny ara-tsaina ny asa ara-batana. Tsy izany mihitsy. Ny tombontsoa avy amin’ny asa ara-batana dia hampifandanja ny maha-olona ary hiaro ny saina tsy ho reraka loatra. Hiampita any amin'ny hozatra ny harerahana ka hanamaivana ny atidoha. (…)
Ilaina ny manana vatana tomady mba hananana saina tomady. Ny vatana tomady sy ny fanaovana tsara ireo andraikitra ao an-tokantrano dia tsy misakana velively ny fivelarana ara-tsaina; samy tena ilaina avokoa ireo ho an'ny vehivavy.
Tokony hampiasaina sy kolokoloina ny herin'ny saina manontolo mba hananan'ny lehilahy sy vehivavy saina mirindra tsara. Maro eto amin'izao tontolo izao ireo lehilahy sy vehivavy manana fisainana mitanila; izany dia vokatry ny ikolokoloany ny ampahany fotsiny amin'ny fahaiza-manaony fa ny ampahany hafa kosa navelany ho simba noho ny fidonanaham-poana. - TFC b. 3, tt. 150-153.