"Tsinjovy ny voromanidina, fa tsy mba mamafy na mijinja, na mitaona ho any an-tsompitra ireny; ary ny Rainareo Izay any an-danitra mamelona azy. Moa tsy mihoatra lavitra noho ireny va hianareo?" - Mat. 6:26
Mofon’aina:
Rehefa mijery ireo hazo lehibe manofahofa ny raviny maitso sy tsara tarehy isika, ary koa mijery ny tany rakotra karipetra ,maitso malefaka, ary ireo voninkazo sy kirihitra mitsiry avy ao amin'ny tany, dia aoka hotsaroantsika fa nampiasain'i Kristy ireo hatsaran-tarehin'ny zavaboary ireo mba hampianarana lesona lehibe momba ny fahamarinana. Rehefa mahita ny salohim-bary mihofahofa eny an-tanimbary isika, ary koa mandre ireo vorona mihira amim-pifaliana ao amin'ny ravinkazo fonenany, sy mahita sambokely eny ambonin'ny farihy, dia tokony hahatsiaro ny tenin'i Kristy teo amoron'ny farihy, teny anaty ala sy teny an-tendrombohitra; ary ireo lesona nampianariny teny amin' ireny toerana ireny dia tokony hotsiahivintsika amin 'ny alalan'ireo zavaboary tahaka ireny izay manodidina antsika.- The Sanitarium Patients at Goguac Lake, 10.
Nampiasain'i Kristy ny hazo lehibe, ny tany voavoly, ny vatolampy mangadihady, ny voninkazo tsara tarehy mitady hirika hitrebonana, ny tendrombohitra mandrakizay, ny voninkazo miraratra eny an-dohasaha, ny vorona mihirahira eny ambony rantsan-kazo, ny lilia tsy misy pentina mamaka any anaty rano. Ny zavatra rehetra izay nandravaka ny tontolo manodidina azy ireo dia nataony ho fitaovana nandraketana lesona tao an-tsain'ny mpihaino Azy. ( ...) Nisarika moramora ny sain' izy ireo izay nandinika ny asan'ny Mpahary teo amin'ny zavaboary hifantoka Andriamanitry ny zavaboary izany.
Hoy i Kristy tao amin'ny iray amin'ireo lesona mafonja indrindra nentiny : "Tsinjovy ny voromanidina, fa tsy mba manie na mijinja, na mitaona ho any an-tsompitra ireny; ary ny Rainareo Izay any an-danitra mamelona azy. Moa tsy mihoatra lavitra noho ireny va hianareo?"
Ilay Mpampianatra Lehibe dia misarika ny sain'ny olona hahatakatra ny fiheveran'ny Ray sy ny fitiavany ireo zanany. (...) Raha mikarakara sy mitsimbina ireo vorona madinika Andriamanitra, moa ve tsy lehibe lavitra noho izany ny fitiavana sy fiahiana asehony amin'ireo zavaboary nohariana araka ny endriny? - The Sanitarium Patients at Goguac Lake, 9, 10, 14-16.