"Fa asiako mafy ny tenako ho mangana ka andevoziko, fandrao, na dia efa nitory tamin'ny sasany aza aho, dia holavina kosa ny tenako." - 1 Kôr . 9:27.
Mofon’aina:
Taorian'ny batisany dia nankany an' efitra ny Zanak'Andriamanitra mba halain'ny devoly fanahy. Niaritra hanoanana mafy Izy nandritra ny enina herinandro teo ho eo. (...) Tsapany ny herin'ny fitiavan-komana eo amin'ny maha-olombelona, ary teo amin'ny toerantsika dia nalaim-panahy tamin'ny fomba henjana indrindra Izy tamin'io lafiny io. Azony ny fandresena teo, ary vitsy no tena mahatakatra izany. Ny herin'ny filan-kanina sy ny fahotan'ny fanaranam-po amin'izany dia tsy mety ho takatra raha tsy amin'ny fandinihana ny faharetan'ilay fifadian-kanina nataon'ny Mpamonjy mba handravana ny fahefan' izany (...).
Ny tsy fahalalana onony no fototry ny haratsiam-pitondrantena rehetra fantatra. Teo amin'izay niantombohan'ny fahasimbana indrindra no nanombohan'ny Mpamonjy ny asa fanavotana. Ny tsy fahalalana onony amin'ny sakafo no nahatonga ny fahalavoan'ireo ray aman-drenintsika voalohany. (...)
Hitan' ny Zanak'Andriamanitra fa tsy vitan'ny herin'ny olombelona samirery ny mandresy io fakam-panahy lehibe io (...). Tonga teto an-tany Izy hampiray ny herin'Andriamanitra amin'ny ezaka ataon'ny olombelona, mba hahafahantsika mandresy amin'ny aIalan'ny hery sy ny tanja-tsaina omeny antsika. Oh! Nietry tokoa Ilay Mpanjakan'ny voninahitra nidina teto amin'izao tontolo izao, niaritra ny hamafin'ny hanoanana sy ny herin'ny fakam-panahy avy amin'ny fahavalo fetsy, mba hahazoany fandresena ho an'ny olombelona. Izany no fitiavana tsy manam-paharoa. Noho ny amin'ny olombelona izany fietrena lalina izany, kanefa zara raha takatr' izy ireo.
Tsy ny hanoanana ihany no tena nahamafy indrindra ny fahorian'ny Mpanavotra antsika. Nitambesatra indrindra tamin'ny fanahiny ny fahamelohana vokatry ny hatendan-kanina izay nahatonga loza lehibe teto amin'izao tontolo izao. (...)
Tamin'ny maha-olombelona Azy, dia sady nilanja ny vesatra maha-tsiravin'ny fahotana teo Aminy ny Mpamonjintsika, no nanohitra an'i Satana tao anatin'ny fakam-panahy lehibe izay mamery ny fanahin'ny olona. Raha resin'ny olona io fakam-panahy io, dia handresy amin'ny lafiny rehetra koa izy. — ST, 7 Aogositra 1879.