"Fa hatramin'ny fony vao nanaovana izao tontolo izao dia lahy sy vavy no nanaovany ny olona. Ary noho izany ny lehilahy dia handao ny rainy sy ny reniny ka hikambana amin'ny vadiny." - Mar. 10:6,7.
Mofon’aina:
Matetika loatra no tsy ampy ny fandinihana mialoha ny hidirana amin'ny fanambadiana. Tsy misy olona voatery hanambady ao anatin'ny fisalasalana. Nefa raha tsy voadinika tsara izany raharaha izany ka efa tanteraka ny fanambadiana, ary mahatsapa ny tsirairay fa tsy mitovy toetra, ary mety hijinja fahoriana ho solon'ny fifaliana, dia aoka tsy hisy olona handre fa tsy tamim-pahendrena no nanaovana ilay fanambadiana. (...) Miharatsy hatrany ny toe-javatra rehefa misy iray amin'ny mpivady, na ny vavy na ny lahy, mahita olon-kafa izay toa mitovy fisainana aminy, ka sahy mamboraka amin'io olona itokiany io ny tsiambaratelon'ny fiainam-panambadiany. Tsy ilaina mihitsy izany fihetsika izany raha toa ka tia an'Andriamanitra ambonin'ny zavatra rehetra ny lahy sy ny vavy. (...)
Hita fa amin'ny ankamaroan'ny tranga izay heverina fa misy izany olana izany, dia ara-tsaina fotsiny ilay izy. (...) Raha nifampiresaka sy niara-nidinika tsara momba izany zavatra izany araka ny fisainan'i Kristy izy mivady, dia ho voavaha ny olana. (...)
Maro no diso hevitra momba ny adidin'ny vavy amin'ny vadiny sy ny adidin'ny lahy amin'ny vadiny. Ny "izaho" no manjary mibahan-toerana, ary efa vonona i Satana (...) mamela-pandrika manodidina ny fanahin'ny olombelona, (...) ka toa tsy ho vitan'ny fahendren'olombelona ny hamaha sy hiala amin'izany ( ...).
Fa izay tsy vitan'ny fahendren' olombelona dia vitan'ny fahendren' Andriamanitra amin'ny alalan'ny fanolorana ny sitrapo, ny saina, ny fanahy, ny hery, ary ny tena manontolo ho eo an-tanan'Andriamanitra. Mahay mampiray ny fo amin'ny fatorana avy any an-danitra ny fitantanany. Ary ny vokatr'izany dia tsy fifanehoam-pitiavana na teny malefaka sy mandoka ivelambelany fotsiny. Ho fanandramana vaovao izany; manenona kofehy tsara sy matanjaka kokoa noho ny an'ny tany ny fanenoman'ny lanitra. Tsy lamba tsotra no akora ampiasaina, fa zava-mateza izay hahazaka ny sedran'ny fiainana; rojo volamenan'ny fitiavana marina no mampifamatotra tsara ny fo. — L, 76, 1894.