"Fa mahalala ny lalana falehako Izy; raha hizahany toetra aho, dia hivoaka tahaka ny volamena."- Joba 23:10
Mofon’aina:
Ny Kristianina izay tia ny Ray any an-danitra dia mety tsy hahita amin'ny fomba azo tsapain-tanana ny soa manokana omen'ny lanitra azy raha mitaha amin'ireo zara raha manolo-tena na tsy manolo-tena ho an'Andriamanitra mihitsy. Matetika mantsy izy no ampahoriana, kivy sy very hevitra ary voageja manodidina. (...)
Tsara toetra i Josefa ary hita taratra teo aminy ny hatsaram-panahy marina sy ny fahitsiana. Na izany aza dia nendrikendrehina izy, nenjehina ary natao toy ny olo-meloka. Nefa Andriamanitra nanana fandresena lehibe ho an'i Josefa, na dia toa nijaly noho ny fanaovana ny tsara aza izy.
Natsipy tao an-davaky ny liona i Daniela noho ny fifikirany tamin'ny fitsipika notanany sy ny fahatokiany tamin'Andriamanitra, nandresy anefa izy tamin'ny farany ary nomem-boninahitra Andriamanitra tamin'ny alalan'ny mpanompony izay nanaiky ny hietry. (...)
Notorahan'ireo fahavalon'i Kristy, ka maty noho izany, i Stefana marina sy mahatoky. Toa tsy hita taratra tokoa fa nanohana ny asany teto an-tany Andriamanitra rehefa namela ireo ratsy fanahy handresy, kanefa izany toe-javatra izany no nanova fo an'i Paoly ho amin'ny finoana, ary tamin'ny alalan'ny teniny avy eo no nitondrana olona an'arivony maro ho eo amin'ny fahazavan'ny filazantsara.
Natao sesitany tany amin'ny nosy manirerin'i Patmo i Jaona malala sady be fitiavana, nefa tany no nisehoan'i Jesosy taminy sy nanambarany taminy ireo toe-javatra hiseho amin'ny andro farany. (...) Navela ho hitany ny seza fiandrianan'Andriamanitra sy ireo voavotra miakanjo fotsy lava, izay avy tamin'ny fahoriana lehibe sy nanasa ny akanjony ka namotsy izany tamin'ny ran'ny Zanak'ondry.- L, 10, 1879.
Raha antsoina hiatrika ny lafaoro mahamay noho ny Aminy ianao, dia ho eo anilanao i Jesosy, tahaka ny niarahany tamin'ireo zatovolahy telo nahatoky tany Babylona. Ireo izay tia ny Mpanavotra azy dia ho faly amin'ny fotoana rehetra izay iarahany mitondra Aminy ny fahafaham-baraka sy ny faniniana. Tonga mamy sy sarobidy aminy ny fahoriana noho ny fitiavany ny Tompony.- TFMB, t. 30.