"Ry rahalahiko, raha misy eo aminareo miala amin'ny fahamarinana, ary misy anankiray mampibebaka azy, aoka ho fantany fa izay mampibebaka ny mpanota hiala amin 'ny làlan 'ny fahadisoany dia hamonj y fanahy tsy ho faty sady hanarona heloka be. " - Jak. 5:19,20.
Mofon’aina:
Miaro ireo nanao fahadisoana ka menatra sy mahatsapa ny fahadalany. Miverina ao an-tsainy mandrakariva ny helony sy ny fahotany hany ka mita hamoy fo tanteraka izy ireo. Aoka tsy hataontsika ambanin-javatra ireny fanahy ireny. Rehefa milomano manohitra ny riandrano ny olona, dia manosika azy hiverina any aoriana ny herin'ny rano manontolo. Aoka ary hisy tanana hanampy azy, tahaka I lay Zoky naninjitra ny tanany sy nandray an'i Petera raha nilentika izy. Aoka hanao teny mitory fanantenana aminy isika. (...)
Mila anao ny rahalahinao ory am-panahy, tahaka ny efa nanjo anao koa. Mila ny fanandraman'ny olona izay efa tojo alahelo toa azy izy, olona izay afaka miaraka ory aminy sy manampy azy. (...) Tsy tokony handalo fotsiny ny fanahy iray mijaly isika fa hiezaka mandrakariva hizara aminy ny fampiononana izay nampiononan'Andriamanitra antsika.
Ny firaisana amin'i Kristy, ny fifandraisana akaiky amin'ny Mpamonjy velona, no manampy ny saina sy ny fo ary ny fanahy handresy ny fahalemen-toetra. Lazao amin'ilay nania fa misy Tanana mahery tsitoha hanohana azy, ary misy fahalemem-panahy tsy misy fetra ao amin'i Kristy izay mangoraka azy. Tsy ampy ny fitokiany amin'ny lalàna sy ny hery fotsiny, izay tsy mangoraka na mihaino ny antso vonjy ataony na oviana na oviana. (...) Ampio izy hahatsiaro mandrakariva fa manatrika eo anilany eo mandrakariva Andriamanitra, mitsinjo azy amin'ny masom-pitiavany. Resaho aminy ny fon'ny Ray izay malahelo noho ny ota, ny tanany mitsotra mba hanampy hatrany, ary ny feony manao hoe: "Aoka hifikitra amin'ny heriko kosa izy ka hihavana amiko (..)" — Isa. 27:5.
Rehefa manao izany asa izany ianao, dia manana sakaiza tsy hitan'ny mason'olombelona. Ny anjelin'ny lanitra no teo anilan'ilay Samaritana nikarakara ilay vahiny naratra. Toy izany koa izay rehetra manompo an'Andriamanitra amin'ny fanampiana ny namany, ary i Kristy mihitsy aza no miara-miasa aminy. — Ms, 126, 1907.