"Ary matoky indrindra aho fa izay nanomboka asa tsara tao anatinareo no hahatanteraka izany mandra-pihavin'ny andron'i Jesôsy Kristy." -Fil. 1:6.
Mofon’aina:
Misy asa fiomanana lehibe tsy maintsy ataon'ny Advantista Mitandrina ny Andro Fahafito raha tian'izy ireo ny ho tafajoro amin'ilay fotoam-pitsapana efa antomotra. Raha mitoetra ho mahatoky amin' Andriamanitra ao anatin'ny fikororohana sy ny fakam-panahin'ny andro farany izy ireo dia tsy maintsy mangataka fahendrena amin'Andriamanitra amin'ny fo manetry tena, mba hahatohitra ny famitahana ataon'ny fahavalo (...).
Aoka hotsaroantsika mandrakariva fa ho avy tsy ho ela ny Tompo, ka hahatsapa tena ny tsirairay ny amin'ny asa tokony mbola hovitainy. Mila manohitra ireo fironana ratsy ao anatintsika isika (...) miaraka amin'ny fanampian'ny Fanahy Masina. Toy izany no anomanantsika ny fontsika handray ny fitahian'Andriamanitra, (...) ka hahatonga ny fiainantsika hifandrindra amin'ny finoana an'i Jesôsy. Tombontsoa lehibe maro no natolotra ho an'ny vahoakan'Andriamanitra ho amin'io asa fiomanana io, tamin'ny alalan'ny fahazavana sy ireo hafatra fampitandremana ary torolalana nomena azy, izay niarnpita taminy tamin'ny alalan'ny asan'ny Fanahy Masina. Mitombo hery ny fakam-panahin'i Satana; izany no mahatonga izao androntsika izao ho feno loza ho an'ny vahoakan'Andriamanitra. Mila mianatra mandrakariva amin'Ilay Mpampianatra lehibe isika mba handeha eo amin'ny lala-marina sy azo antoka isaky ny indray mandingana.
Misy toe-javatra mahagaga maro miseho eo anoloantsika, ary amin'izao fotoana izao no tokony ho epistily velona ny fiainan'ireo mitonona ho vahoakan'Andriamanitra mba ho hitan'ny olona rehetra fa amin'izao andro izay anjakan'ny faharatsiana izao dia mbola misy olona mampilefitra ny sitrapony ka mikatsaka hanao ny sitrapon'Andriamanitra — olona manana ny lalàn'Andriamanitra voasoratra ao am-pony sy eo amin'ny fiainany. Misy fakam-panahy lehibe sy fizahan-toetra mahamay miandry antsika. Mila miomana ho amin'io fotoam-pitsapana io ny vahoakan'Andriamanitra mitandrina ny didiny, amin'ny alalan'ny fifankazarana lalina kokoa amin'ny zava-panahy sy ny fampiharana ny fahalalana ny fahamarinan'i Kristy eo amin'ny fiainany (...). Tsy ho an'ny tsy mpino ihany no ilazana ity teny ity fa ho an'ny mambran'ny fiangonana ihany koa: "Mitadiava an'i Jehôvah , dieny mbola hita Izy, miantsoa Azy, dieny mbola akaiky Izy." — Isa. 55:6. — HP, t. 347.