« Indro, izao ihany no hitako: nataon'Andriamanitra mahitsy ny olona, kanjo namorona sain-kafa maro izy. » Mpitt. 7:29.
Mofon’aina:
Mirakitra tantara marina momba ny fiainan’ny fiarahamonina sy ny fiainan’ny isam-batan’olona ny bokin’ny Genesisy, kanefa dia tsy mahita velively fitantarana momba ny zaza teraka izay jamba, na marenina, na mandringa, na kilemaina, na tsy vory saina isika. Tsy misy ohatra momba ny fahafatesan’ny zaza menavava, na ny ankizy, na ny tanora vao herotrerony ao (...) Tahaka izao ny filazana manjò ao amin’ny bokin’ny Genesisy: “Ary ny andro rehetra niainan’i Adama dia telo-polo amby sivin-jato taona; dia maty izy.” “Ary ny andro rehetra niainan’i Seta dia roa ambin’ny folo amby sivin-jato taona; dia maty izy”. (...)
Nomen’Andriamanitra herim- batana lehibe ny olona hany ka voatohitr’izy ireo ny aretina mpahazo ny taranak’olombelona vokatry ny fahazarana manimba, ary nitohy nandritra ny enina arivo taona izany. Io zava-misy io dia porofo ampy hanehoana amintsika ny hery sy ny tanjaka izay nomen’Andriamanitra ny olona tamin’ny famoronana azy. (...) Raha toa i Adama, tamin’ny namoronana azy, ka tsy nomena herim- batana indroapolo avo heny noho izay ananan’ny olona ankehitriny, dia efa ringana ny taranak’olombelona tahaka izay noho ny fahazarany ankehitriny sy ny fiainany mifanohitra amin’ny lalàna voajanahary. (...)
Tsy namorona ny taranak’ olombelona amin’izao toe-tenany marefo ankehitriny izao Andriamanitra. Tsy vokatry ny asan’Andriamanitra io toe-javatra io, fa vokatry ny asan’ny olombelona. Fahazaran-dratsy sy fanararaotana ary fandikana ny lalàna napetrak’Andriamanitra mba hifehy ny fiainan’ny olona no nitondra izany.
Noforonin’Andriamanitra ho voninahiny ny olona, mba hahatonga ny fianakaviàmben’ny olombelona hiray amin’ny fianakaviamben’ny lanitra rehefa avy notsapaina sy nosedraina izy ireo. Fikasan’Andriamanitra ny hameno ny lanitra amin’ny fianakaviamben’ny olombelona, raha toa ka nankatò ny teniny tsirairay izy ireo.
Ho an’i Eva dia toa zavatra kely ny tsy hankato an’Andriamanitra tamin’ny fanandramana ny voan’ny voankazo voarara, sy ny haka fanahy ny vadiny koa mba tsy hankatô; kanefa ny fahotan’izy ireo no nanokatra ny varavarana mba hidiran’ny fahoriana teto amin’izao tontolo izao. Iza no mahalala, amin’ny fotoana itrangan’ny fakam-panahy, ireo vokatra mahatsiravina izay hateraky ny dingana diso iray monja? – CC, t. 21.