"Ary rehefa niara-nihevitra tamin'ny olona Izy, dia nanendry mpihira ho an'i Jehôvah hidera amin'ny fihaingoana masina, raha mivoaka eo anoloan'ny olona efa voaomana hiady, ka hanao hoe: Hidera an'i Jehôvah, fa mandrakizay ny famindram-pony. - 2 Tant. 20:21.
Mofon’aina:
Fomba tsy mahazatra no nataon'izy ireo handeha hiatrika ady; fiderana an'Andriamanitra tamin'ny alalan'ny hira, fanandratana an'Andriamanitry ny Isiraely. Izany no hiran'ady noventesin’izy ireo. Manana ny fahatsaran'ny fahamasinana izy ireo. Raha be kokoa ny fiderana an'Andriamanitra asandratra ankehitriny, dia hitombo ny fanantenana, ny herim-po sy ny finoana. Ary moa ve tsy hanatanjaka ny tanan'ireo miaramila mavitrika izay mijoro ankehitriny hiaro ny fahamarinana izany.
Nidera an'Andriamanitra noho ny fandresena azony nomena izy ireo, ary efatra andro taorian'izay dia niverina nirongo harena nobaboina avy amin’ny fahavalony izy ireo, nihira fiderana noho ny fandresena azo.
Rehefa manana fahatakarana lalina kokoa ny amin’ny famindram-po sy ny fitiavan'Andriamanitra isika dia hidera Azy, fa tsy hitaraina. Hanambara ny amin'ny fikarakarana am-pitiavana ataon'Andriamanitra isika sy ny amin'ny fangorahan'llay Mpiandry Tsara. Tsy ho fimonomononana sy fitarainana ny teny hiloatra avy ao am-po. Fiderana, toy ny renirano mikoriana madio, no hipololotra avy ao amin'ireo tena mino an'Andriamanitra marina (...)
Maninona moa raha asandratra ny feo hiventesana hira ara-panahy ety am-pivahinianana ety? Mila mianatra ny Tenin'Andriamanitra isika, mba handinika sy hivavaka. Amin'izay dia hahiratra ny masom-panahintsika hahita ny ao anatin'ny tempoly any an-danitra. Hipaka amintsika ireo feon-kira fisaorana asandratry ny antoko mpihiran'ny lanitra manodidina ny seza fiandrianana.
Rehefa hitsangana sy hamiratra i Ziona, dia hazava aoka izany ny fahazavany ary ho re eo amin'ny fiangonan’ny olo-marina ny hira fiderana sy fisaorana. Tsy ho tazana intsony ireo fahadisoam-panantenana kely sy zava-tsarotra kely.
Jehôvah no mpanampy antsika (...) Tsy nisy manenina izay matoky an'Andriamanitra. Tsy mba mandiso fanantenana na oviana na oviana ireo izay miantehitra Aminy Izy. Raha manao ny asa izay ampanaovin'Andriamanitra antsika isika, ka manara-dia an'i Jesôsy, dia ho tonga lokanga masina ny fontsika, ka ny tady tsirairay amin'izany dia handefa fiderana sy fisaorana ho an 'Ilay nirahin'Andriamanitra hanaisotra ny fahotan'izao tontolo izao. - CC, 1. 218.