Fepetra ao anatin'ny fanekena "Koa ankehitriny, raha hihaino ny feoko tokoa hianareo ka hitandrina ny fanekeko, dia ho rakitra soa ho Ahy mihoatra noho ny firenena rehetra hianareo; fa Ahy ny tany rehetra. " — Eks. 19:5.
Mofon’aina:
Tamin'ny voalohany dia nomen' Andriamanitra ny taranak' olombelona ny lalany ho fomba hahazoan'izy ireo fahasambarana sy fiainana mandrakizay.
Ny Didy folo dia teny fikasana folo izay hotanterahina amintsika raha ankatoavintsika ny lalana mifehy izao rehetra izao. "Raha tia Ahy hianareo, dia hitandrina ny didiko. " — Jao. 14:15. Voafintina eto ny votoatin'ny lalan'Andriamanitra. Asongadina eto ny fomba amonjena ny zanakalahy sy ny zanakavavin'i Adama rehetra. (...)
Hita ao amin'ny Didy folo ny fitiavana lehibe indrindra azo aseho amin'ny olona. Feon'Andriamanitra avy any an-danitra izany lalana izany, feo izay manambara teny fikasana amin'ny fanahin'ny olona. "Ataovy izany, dia tsy hanapaka na hifehy anareo i Satana". Tsy fandrarana izany lalana izany, na dia mety ho toy izany aza no fijery azy. Ny ambaran'ny lalana dia hoe ATAOVY, dia ho VELONA ianao.
Ny ilaina ankehitriny hahazoana ny fiainana mandrakizay dia sahala amin'ny ta1oha ihany - mitovy indrindra amin'ny tany am-Paradisa, raha tsy mbola lavo ireo ray aman-drenintsika voalohany - dia ny fankatoavana tanteraka ny lalan'Andriamanitra, ny fahamarinana tanteraka. Ary raha latsaka noho izany no ahazoana ny fiainana mandrakizay, dia hidiran-doza ny fahasambaran'izao rehetra izao. Hivoha ny lalana hidiran'ny ota mbamin'ny loza sy ny fahoriana manaraka azy, izay hanjary tsy ho azo vonoina mandrakizay.
Tsy nampihen-danja ny fitakian'ny lalana i Kristy. Tamin'ny fomba tsy misy diso no nanehoany ny fankatoavana izany lalana izany amin'ny maha-fepetra ahazoana ny fiainana mandrakizay azy — tahaka ny fepetra notakina tamin'i Adama sy Eva koa talohan'ny fahalavoany (...).
Mitovy ny fenitra ara-pitondran-tena aseho ao amin'ny TT sy ny TV. Tsy fenitra tsy hay tratrarina tsy akory izany fenitra izany. Ao amin'ny didy na baiko tsirairay omen'Andriamanitra dia misy teny fikasana tsara indrindra. Efa nataon'Andriamanitra ny fomba rehetra mba hahatonga antsika ho tahaka Azy, ary hotanterahiny ho an' izay rehetra tsy manohitra ny fahasoavany amin'ny alalan'ny sitrapo ratsy izany. — GAG, t. 134.