"Koa amin'izany aoka ho tanteraka hianareo toy ny fahatanterahan'ny Rainareo Izay any an-danitra." — Mat. 5:48.
Mofon’aina:
Mety ho vitan'ny lehilahy sy ny vehivavy ny ho tonga tanteraka amin'ny alalan'ny fampiasany ny fahaiza-manaony rehetra ho voninahitr'Andriamanitra; ary Andriamanitra no nahatonga izany ho azo tanterahina tamin'ny nanolorany ny Zanany ho an'izao tontolo izao. Nomeny azy ireo tao amin'i Kristy ny haren'ny fahasoavany sy ny fahalalana ny sitrapony. Ho afaka hanatratra ilay tanjona ambony napetrak'Andriamanitra ho azy izy ireo raha manafoana ny "izaho" sy mianatra mandeha amim-panetren-tena, ary miantehitra amin'Andriamanitra mba hotarihiny.
Iza i Kristy ho antsika? Miorina amin'izany ny fanatanterahana ny toetra. Raha miankina mandrakariva amin'ny fahamendrehan'ny Mpamon-jintsika isika ka manaraka ny diany, dia ho tahaka Azy, madio tsy misy pentina.
Tsy mitaky zavatra tsy azo tanterahina amin'ny fanahin'ny olona Andriamanitra. Tsy nangataka na inona na inona tamin'ny mpianatra Izy raha tsy efa vonona hanome azy ireo ny fahasoavana sy ny hery hanatanterahana izany. Tsy ho niantso azy ireo ho amin'ny fahatanterahana izy raha tsy efa eo an-tanany ny fahatanterahana rehetra avy amin'ny fahasoavana, homeny ireo izay tiany hanankinana tombontsoa ambony sy masina izany. (...)
Ny anjarantsika dia ny manatratra, ao anatin'ny faritra misy antsika, ny fahatanterahan-toetra izay nananan'i Kristy teo amin'ny fiainany teto an-tany, tamin'ny lafiny rehetra. Izy no Ohatra ho antsika. Mila miezaka isika mba hanome voninahitra an'Andriamanitra amin'ny zavatra rehetra, amin'ny toetrantsika. (...) Tsy maintsy miantehitra tanteraka amin'Ilay hery efa nampanantenainy antsika isika. (...)
Ny Mpamonjintsika dia Mpamonjy manao izay hahatanteraka ny olombelona amin'ny fahafenoany. Tsy ampahany amin'ilay olona fotsiny no ifantohany. Miasa ho fandavorariana ny maha-olombelona manontolo ny fahasoavan'i Kristy. Izy no nahary ny rehetra. Izy no nanavotra ny rehetra. Izy no nanao ny saina, ny hery sy ny vatana ary ny fanahy, ho mpiray amin'ny fomban'Andriamanitra; fananany novidiny ireo rehetra ireo. Amin'ny saina, ny fo, ny fanahy, ary ny hery manontolo no tsy maintsy anompoana Azy. Dia homem-boninahitra ao amin'ny olony masina ny Tompo, na dia amin'ireo raharaha mahazatra sy ara-nofo ataony aza. Hapetraka eo amin'izy ireo ny soratra hoe: "Hamasinina ho an'i Jehôvah". — GAG, t. 230.