Hodinihina mandritra ny herinandro: Mat. 12:38-42; Jona 3:5-10; Apôk . 18:4; Dan. 5:1-31; Apôk. 16:12-19; 2 Tant. 36:22,23.
Tsianjery:
"Dia hoy izy tamin'ireo: Hebreo aho; ary Jehôvah , Andriamanitry ny lanitra, no ivavahako, dia Izay nanao ny ranomasina sy ny tany maina." - Jona 1:9
Ity herinandro ity no hijerentsika farany ireo tantara izay manampy antsika hahatakatra mazava tsara ny toe-javatra samihafa hiseho amin'ny andro farany. Hojerentsika amin'izany ny iraka nampanaovina an'i Jõna tany Ninive, ny faharavan'i Babilona, ary ny fiakaran'i Kyrosy mpanjaka persianina izay nanafaka ny vahoakan'Andriamanitra sy namela azy ireo hiverina tany amin'ny tany nampanantenaina.
Toy ireo hafa efa nodinihintsika, dia manana heviny lalina ho an'ny taranaka rehetra koa ireo tantara ireo. Ary manokana kokoa ny hevitr'izany ho an'ny taranaka amin'ny andro farany izay velona mialoha ny fiverenan'i Kristy. Izany hoe, azontsika atao ny misintona ampahan-kevitra samihafa avy amin'ireo tantara ireo, izay hanampy antsika hahatakatra bebe kokoa ny atao hoe "fahamarinana ankehitriny."
Etsy andanin'izany anefa, dia misy zavatra iray tokony hotsaroantsika mikasika ireo tantara rehetra ireo, izay toa manambara mialoha ireo toe-javatry ny andro farany: ny hijery amim-pitandremana ireo lohahevi-dehibe resahina sy ireo hevitra entina hampitana izany ka tsy hiezaka hamaofivaofy ny tsipiriany rehetra fandrao haneho fifanipahan-kevitra ao amin'ny faminaniana. Tahaka ny ao amin'ny fanoharana nataon'i Jesôsy no tokony hijerentsika koa ireo hevitra sy fitsipika manan-danja. Aoka isika tsy hitsikera ny tsipirian-javatra tsirairay noho ny fanantenana hahita fahamarinana miafina ao anatiny. Ny tokony hataontsika dia ny mijery ny firafitra sy ny fitsipika satria avy amin'izany no hahitantsika hevitra manan-danja ho an'ny andro farany.
*Famerenana ny lesona ny sabata 28 Juin.