Hodinihina mandritra ny herinandro: Jao. 1:19-23; Isa. 40:1-5; Jao. 1:29-37; Rôm. 5:6; Jao. 1:35-39; Jao. 1:43-51; Jao. 3:1-21.
Tsianjery: "Jesôsy namaly ka nanao taminy hoe: Lazaiko aminao marina dia marina tokoa: Raha tsy ateraka indray ny olona, dia tsy mahazo mahita ny fanjakan'Andriamanitra."— Jao. 3:3.
Tsy isalasalana fa notohanan'i Jesôsy porofo mazava avy ao amin'ny Soratra Masina ireo fanambarana nataony momba ny Tenany teo imason'ny vahoaka, anisan'izany ilay fanambarany hoe: "Lazaiko aminareo marina dia marina tokoa: Izay mino no manana fiainana mandrakizay."— Jao. 6:47.
Kanefa nanao mihoatra noho izany Izy, nanova ny rano ho divay, namahana olona an'arivony tamin'ny alalan'ny mofo vitsy monja, nanasitrana ny zanak'ilay tandapa, nanasitrana ilay lehilahy teo anilan’ny farihy Betesda, nampahiratra ilay lehilahy teraka jamba, ary nanangana an'i Lazarosy tamin'ny maty. Toe-javatra sy olona isan-karazany no resahin'i Jaona — Jiosy, Jentilisa, mpanan-karena, mahantra, lehilahy, vehivavy, mpanapaka, olon-tsotra, olona avara-pianarana, sy tsy nandia fianarana — mba hanambarany ny maha-Izy an'i Jesôsy.
Resahin'i Jaona koa aza ny amin'ny fanambarana ataon'Andriamanitra Ray sy ny Soratra Masina; izany rehetra izany ho fanaporofoana ny maha-Izy an'i Jesôsy.
Ny fanambarana lehibe nataon'i Jaona mpanao batisa no hanombohantsika ity herinandro ity. Ho hitantsika koa ny fanambaran'ireto olona manaraka ireto: i Andrea sy i Simona Petera, i Filipo sy i Natanaela, ary ilay tsy ampoizina indrindra: i Nikôdemôsy fariseo. Kanefa misy vavolombelona iray manao fanambarana, izay miafina ao ambadik'izy ireo (mpianatra iray niaraka tamin'i Andrea, ao amin'ny Jao. 1:35,40) — tsy iza izany fa i Jaona mihitsy.