Vakio ny Mar. 7:1-13. Inona ny fahamarinana manan-danja aseho eto?
Alao sary an-tsaina ny ankizy mianatra momba ity andalan-teny ity ao amin'ny Sekoly Sabata ka milaza amin-dreniny rehefa tonga any an-trano fa tsy voatery hanasa tanana izy mialoha ny hisakafoana satria izany no nambaran'i Jesôsy. Tsy mahakasika ny fahasalamana anefa ity tantara ity.
Olona maro tany amin'izany tany izany, tamin'ny andron'i Jesôsy, no sarotiny fatratra momba ny fombafomba mifandraika amin'ny fahadiovana. Niitatra tamin'ny olon-tsotra, nandritra ny vanim-potoana teo anelanelan'ireo Testamenta roa, ny fanasana tanana mba hampadio araka ny fomba, na dia natao mba hampiharin'ireo mpisorona tamin'ny andron'ny Testamenta Taloha aza izany fitsipika izany tany am-piandohana (Eks. 30:17-21). Nifandraika tamin'izany fomba fijery izany ny fimonomononan'ny mpitondra fivavahana tamin'i Jesôsy mikasika ireo mpianany.
Tsy novalian'i Jesôsy teo no ho eo ny fanontaniana napetraka taminy fa niaro ireo mpianany tamin'ny valinteny roa sosona izy. Voalohany, naveriny ny teny fananarana mahery vaika nataon'i Isaia tamin'ny firenena izay manaja an'i Jehôvah amin'ny molony kanefa mampanalavitra Azy ny fony (Isa. 29:13). Manohy izany teny avy ao amin'ny Isaia izany ny fanamelohana mifandraika amin'ny fametrahana ny fombafomban'olombelona ho eo amin'ny toeran'ny didin'Andriamanitra.
Namerina indray ny teny nataon'i Isaia ny tapany faharoa tamin'ny valintenin'i Jesôsy. Naverin'ny Tompo ny didin'Andriamanitra ny amin'ny hanajana ny ray aman-dreny (Eks. 20:12); izany hoe, ny tokony hikarakarana azy ireo amin'ny fahanterany. Nampifanoheriny tamin'izany ny fombafombam-pivavahana izay nanoloran'ny olona fanatitra ho an'Andriamanitra (fanomezana, korbana), na nampiasany izany ho an'ny tenany, kanefa tsy nanaiky ny hampiasa izany ho an'ireo ray aman-dreniny efa antitra izay mahantra izy ireo. Toa azontsika an-tsaina izany tantara izany: "Miala tsiny aho ry Dada, te hanampy anao aho kanefa nomeko ny tempoly ny vola."
Izany karazana fihatsarambeiatsihy izany no nomelohin'i Jesôsy tsy tamim-pihambahambana. Nametraka ny fomban'olombelona ho ambonin'ny Tenin'Andriamanitra izy ireo, ary nanota izy tamin'izany.
Inona àry no valin'ny fanontanian'ireo Fariseo? Hita taratra tamin'ny valintenin'i Jesôsy fa tsy resy lahatra izy fa zava-dehibe araka ny sitrapon'Andriamanitra ny fanasana tanana izay nampidrikina ireo Fariseo. Manohana an-karihary ny baikon'ny Lalàna ho ambonin'ny fomban'olombeiona kosa ny valinteniny. (Jereo koa ny Mar. 1:44; Mar. 7:10-13; Mar. 10:3-8; Mar. 12:26, 29-31).
Mety hanana "fombafomba" izay mifanohitra amin'ny didin'Andriamanitra ve isika? Raha eny, inona izany?