Vakio ny Sal. 16:8: Sal. 44:8; Sal. 46:1; Sal. 47:1,7; Sal, 57:2; Sal. 62:8; Sal. 82:8 ary ny Sal. 121:7. Inona ny toerana tanan’Andriamanitra eo amin'ny fiainan'ny mpanao Salamo?
Mifantoka manontolo amin’Andriamanitra ny tontolon’ny Salamo; manao izay hampileferana Aminy ireo fanandramam-piainana rehetra, amin’ny alalan'ny vavaka sy ny fiderana izany. Andriamanitra no Mpamorona tsitoha, sy Mpanjaka ary Mpitsara ny tany rehetra. Manome ny zavatra rehetra ho an’ny zanany Izy ka tokony hitokiana amin’ny fotoana rehetra. Na ireo fahavalon’ny vahoakan’Andriamanitra aza dia manontany hoe: “Aiza izay Andriamanitrao?" rehefa hita ho tsy mahomby ny vahoakan’Andriamanitra (Sal. 42:10). Eo mandrakariva ny Tompo ary Andriamanitra tsy mba manary ny olony, koa teo mandrakariva ho azy ireo Izy. Farany, miresaka mialoha momba ny fotoana izay hihobian’ny olona rehetra sy ny firenen-drehetra an’Andriamanitra ny Salamo (Sal. 47:1; Sal. 64:9).
Rehefa atao ivon’ny fiainana Andriamanitra dia manjary mifantoka amin’ny fiankohofana ny fiainana. Samy hafa amin’ny fiankohofana araka ny fahatakaran’ny ankamaroan’ny olona azy ankehitriny ny fiankohofana nataon'ny Salamo, satria ny fiankohofana tamin’ny kolontsain’ny Baiboly dia tsy isalasalana fa ivon’ny fiainan’ny fiarahamonina iray manontolo. Araka izany, ny zavatra rehetra izay nitranga, na ny ratsy na ny tsara, teo amin’ny fiainan'ny vahoakan’Andriamanitra dia nambara tamin’ny fiankohofana. Ren’Andriamanitra ny mpanao Salamo, na aiza na aiza no misy azy, ary valiany amin’ny fotoana hitany fa mety indrindra (Sal. 3:4; Sal. 18:6; Sal. 20:6).
Fantatry ny mpanao Salamo tsara fa any an-danitra no fitoeran’Andriamanitra, kanefa miaraka amin'izay dia monina any Ziona Izy, ao amin’ny fitoerana masina eo amin’ny olony. Sady lavitra Andriamanitra no akaiky, any amin’ny toerana rehetra Izy, ary ao amin’ny tempoliny (Sal. 11:4), miery (Sal. 10:1), ary manatrika (Sal. 41:12). Atambatra ao amin’ny Salamo ireo toetran’Andriamanitra izay toa mifanohitra ireo raha ny fijery azy. Takatry ny mpanao Salamo mantsy fa tsy afa-misaraka amin’ny maha-lzy an’Andriamanitra ny maha-lavitra sy akaiky Azy (Sal. 24:7-10). Ny fahafantaran’izy ireo ny fahatsaran’Andriamanitra sy ny fanatrehany, eo anatrehan’ny toe-javatra rehetra lalovany, no mampahatanjaka ny fanantenany raha eo am-piandrasana ny fidiran’Andriamanitra an-tsehatra na oviana na oviana ary amin’izay tomba safidiny hanaovana izany.
Ahoana no anampian'ny mpanao Salamo antsika hahatakatra fa tsy azontsika ferana ho amin’ny lafiny sasany amin'ny fisiantsika fotsiny Andriamanitra? Ampahany inona amin’ny fiainanao no tadiavinao hanalavirana an’Andriamanitra?