"Ary tsy ho eo amin'izao tontolo izao intsony Aho, fa izy ireto no ho eto amin'izao tontolo izao, ary Izaho mankany aminao,Ray masina ô, tehirizo ireo amin'ny anaranao izay nomenao Ahy, mba ho iray ihany izy, tahaka ny mahiray Antsika." - Jao. 17:11
Mofon’aina:
Aiza no hahitantsika ny fahadiovana, sy ny fahatsaran-toetra ary ny fahamasinana izay hiantoka ny fiarovana antsika? Aiza no misy valan'ondry tsy azon'ny amboadia hidirana? (...) Manana tena voalamina izay hataony fitaovana hiasana ny Tompo. Mety mihoatra noho ny roapolo ny Jodasy eo amin'izy ireo; mety misy Petera izay handà ny Tompony rehefa tonga ny fizahan-toetra; mety ho ao koa ireo tahaka an'i Jaona ilay tian'i Jesôsy izay manana hafanam-po mety hanimba ny fiainan'ny hafa amin'ny fiantsoana afo avy any an-danitra ho famaliana azy ireo noho ny fitenenany ratsy an'i Kristy sy ny fahamarinana. Kanefa ilay Mpampianatra lehibe dia mitady ny fomba hanomezana lesona (...) ho fanitsiana ireo faharatsiana ireo. Tahaka izany koa no ataony amin'ny fiangonany ankehitriny. (...)
Asehony azy ireo fa mampidi-doza ny fitiavan-tena sy ny avonavona ary ny fanandratan-tena rehetra, ny tsy finoana sy ny hevitra mibahana mialoha rehetra, izay mitarika ho amin'ny fanoherana ny fahamarinana sy fialana amin'ilay tena fahazavana, ary raha tsy ibebahana ireny dia ho tavela ao amin'ny haizina tahaka ny firenena jiosy tamin'izany andro izany ny olona izay mankamamy azy. Aoka ny fanahy tsirairay amin'izao andro izao hikatsaka izay hahazoan'i Kristy valim-bavaka. Aoka ny fanahy tsirairay avy hamerina ao an-tsainy izany vavaka izany, (...) mba ho iray tahaka ny maha-iray an'i Kristy sy ny Ray ny rehetra (...). Aoka izy ireo tsy hampitodika ny fitaovam-piadiana ho ao amin'ny laharana misy antsika fa hampitodika izany kosa amin'ireo fahavalon'Andriamanitra sy ny fahavalon'ny fahamarinana. (...)
Tsy maintsy vohana hidiran'ny Fanahy Masina ny varavaran'ny fo. (...) Vakio ny vavaka nataon'i Kristy ho amin'ny firaisantsika (Jao. 17:11). Tsy ho an'ireo mpianatra ankehitriny ihany izany vavak'i Kristy izany, fa ho an'ireo rehetra mino Azy amin'ny alalan'ny tenin'ireo mpianany, eny hatramin'ny faran'izao tontolo izao (...). - RC, t. 199.