"Ary tamin 'izany izay natahotra an 'i Jehôvah dia samy niresaka tamin'ny namany avy; ary Jehôvah nihaino ka nandre izany; ary nisy boky nosoratana teo anatrehany ho fahatsiarovana izay matahotra an 'i Jehôvah sy mihevitra ny anarany." - Mal. 3:16
Mofon’aina:
Omena ny Kristianina ny fifaliana amin'ny fandraisana ny taratry ny fahazavana mandrakizay avy eo amin'ny seza fiandrianan'ny voninahitra, ary ny fampitana ny taratr'ireny eo amin'ny lalany sy eo amin'ny lalan'ireo mifandray aminy koa. Amin'ny fanaovana teny feno fanantenana sy fampaherezana, (...), no hanampiany ireo manodidina azy ho tsaratsara kokoa sy hanandratany azy ary hampitodihany azy ho amin'ny lanitra sy ny voninahitra. Amin'izany koa no hitarihany azy ireo hikatsaka ny lanitra mihoatra noho ny zavatry ny tany, dia ilay lova tsy mety lo sy harena tsy mety simba.
"Mifalia mandrakariva amin'ny Tompo" hoy ny apôstôly Paoly (...). Na aiza na aiza no alehantsika dia tokony hitondra rivo-piainan'ny fifaliana sy fanantenana kristianina isika; amin'izany no ahitan'ireo tsy Kristianina fa manintona ny fivavahana torintsika (...).
(...) Amin'ny maha-Kristianina antsika, dia anarina isika tsy hahafoy ny fiaraha-mivavaka, mba ho famelombelomana antsika, ary hizara ny fampaherezana izay noraisintsika avy amin'izany. (...)Aoka hasehontsika amin'ny endrika sy ny toetrantsika ary ny tenintsika sy ny fombantsika fa tsara ny manompo an'Andriamanitra. Amin'izany no hitoriantsika fa "tsy misy tsiny ny lalàn'i Jehôvah, mamelombelona ny fanahy." - Sal. 19:7.
Tokony ho fotoana hisian'ny fifanampiana sy fifampaherezana ny fotoam-bavaka sy ny fivoriana ataontsika. Fomba iray tsara indrindra ahafahana manao izany ny fananana fanandramana vaovao isan'andro mikasika ny zava-panahy (...).
Raha misaintsaina sy miresaka bebe kokoa momba an'i Jesôsy isika fa tsy momba ny tenantsika, dia tokony hahatsapa bebe kokoa ny Fanatrehany. Raha mitoetra ao Aminy isika dia ho feno fiadanana sy finoana ary herim-po ary hanana fanandramana tsara hozaraina isika rehefa manatrika ny fivoriam-bavaka, mba hahazoan'ny hafa famelombelomana avy amin'ny fijoroana ho vavolombelona Ireny teny midera ny voninahitry ny Fahasoavany ireny, rehefa tohanan'ny fiainana tahaka izay niainan'i Kristy, dia manana hery tsy hay tohaina, izay miasa ho famonjem-panahy. - RC, t. 220.