"Fa mandosira ny filan'ny tanora fanahy; ary miezaha mitady fahamarinana, finoana, fitiavana, fihavanana amin 'izay miantso ny Tompo amin 'ny fo madio. " - 2 Tim. 2:22.
Mofon’aina:
Mitombo isan'andro ny loza mananontanona ny tanora sy ny lehibe mahakasika ny fitondrantena. Mivelatra ny toerana iasan'ny fitotonganam-pitondrantena ka mahatonga hery miasa mangina ratsy sy ambany tokoa eo amin'ny lehilahy sy ny vehivavy ary ny tanora izay mitonona ho Kristianina. (...)
Andairan'ny fakam-panahin'i Satana ireo izay efa mahafantatra ny fahamarinana kanefa tsy manao asa mifanaraka ny finoana nekeny. Misehatra loza isaky ny indray mandingana izy ireo. Feno faharatsiana manodidina azy, mahita sary sy mandre zavatra izay manetsika ny filany tsy voafehy izy ireo; manjary mora voataona hifidy ny ratsy fa tsy ny tsara izy satria tsy madio ny fony. (...)
Aoka hianaran'ny rehetra fa misy hery lehibe ao amin'ny fahatsaran-toetra. Ny fanofanana ilaintsika indrindra amin'izao andro izao dia ny fanomanana ireo tanora lehilahy sy vehivavy hanana fahitsiam-pitondrantena sy hanadio ny fanahiny ho afaka amin'ny pentin' ny fahalotoam-pitondrantena rehetra. (...)
Efa hifarana ny fotoam-pahasoavana, dia ilay fotoana andinihan'Andriamanitra ny momba ny olona tsirairay. izao no fotoana nomen'Andriamanitra antsika mba hamolavolana toetra madio sy masina. Raha tsy hararaotina tsara izao fotoana izao, raha maloto ny eritreritra, raha tsy hamasinina ny fo, raha mbola misy fahazaran-dratsy leferina, dia azo antoka fa hanana ny anjarany miaraka amin'ireo ratsy fanahy sy ny vetaveta, izay maharikoriko an'Andriamanitra, ny olona toy izany.
Amin'izao androm-pahasoavana izao no tsy maintsy anaovan'ny fanahy tsirairay safidy. Hatao eo anivon'ny fianakaviana, eo anivon'ireo mambra ao am-piangonana izany. Hisy valiny soa ny hatsaran-toetra sy ny foto-kevitra marina tsy misy fitiavan-tena, satria hifindra sy ho hita taratra eny amin'ny hafa izany. (...) «Ny voany no hahafantaranareo azy.» - Mat. 7:20 - L, 26d, 1887.